ಯದ್ವೈ ತನ್ನ ಪಶ್ಯತೀತ್ಯಾದೇಃ ಸಂಬಂಧಂ ವಕ್ತುಂ ವೃತ್ತಂ ಕೀರ್ತಯತಿ —

ಸ್ತ್ರೀಪುಂಸಯೋರಿತಿ ।

ಚಕಾರಾದುಕ್ತಂ ಸ್ವಯಂಜ್ಯೋತಿಷ್ಟ್ವಮಿತಿ ಸಂಬಧ್ಯತೇ ।

ಕಿಮಿದಂ ಸ್ವಯಂಜ್ಯೋತಿಷ್ಟ್ವಮಿತಿ ತದಾಹ —

ಸ್ವಯಂಜ್ಯೋತಿಷ್ಟ್ವಂ ನಾಮೇತಿ ।

ಏವಂ ವೃತ್ತಮನೂದ್ಯೋತ್ತರವಾಕ್ಯವ್ಯಾವರ್ತ್ಯಾಂ ಶಂಕಾಮಾಹ —

ಯದೀತ್ಯಾದಿನಾ ।

ಸ್ವಭಾವತ್ಯಾಗಮೇವಾಭಿನಯತಿ —

ನ ಜಾನೀಯಾದಿತಿ ।

ತತ್ತ್ಯಾಗಾಭಾವೇ ಸುಷುಪ್ತೇ ವಿಶೇಷವಿಜ್ಞಾನರಾಹಿತ್ಯಮಯುಕ್ತಮಿತ್ಯಾಹ —

ಅಥೇತ್ಯಾದಿನಾ ।

ಆತ್ಮಾ ಚಿದ್ರೂಪೋಽಪಿ ಸುಷುಪ್ತೇ ವಿಶೇಷಂ ನ ಜಾನಾತಿ ಚೇತ್ಕಿಂ ದುಷ್ಯತೀತ್ಯಾಶಂಕ್ಯಾಽಽಹ —

ವಿಪ್ರತಿಷಿದ್ಧಮಿತಿ ।

ಪರಿಹರತಿ —

ನೇತಿ ।

ಉಭಯಂ ಚೈತನ್ಯಸ್ವಭಾವತ್ವಂ ವಿಶೇಷವಿಜ್ಞಾನರಾಹಿತ್ಯಂ ಚೇತ್ಯರ್ಥಃ ।

ಉಭಯಸ್ವೀಕಾರೇ ಶಂಕಿತಂ ವಿಪ್ರಷೇಧಮಾಕಾಂಕ್ಷಾಪೂರ್ವಕಂ ಶ್ರುತ್ಯಾ ನಿರಾಕರೋತಿ —

ಕಥಮಿತ್ಯಾದಿನಾ ।