ರಾಜ್ಞೋಽಕೌಶಲಂ ಪರಿಹೃತ್ಯ ಮಂತ್ರಾನವತಾರಯತಿ —
ಆತ್ಮಕಾಮಸ್ಯೇತಿ ।
ಯದೇತ್ಯಾದ್ಯತೀತಶ್ಲೋಕೇನಾಽಽಗಾಮಿಶ್ಲೋಕಾನಾಮರ್ಥಾಪೌನರುಕ್ತ್ಯಂ ಸೂಚಯತಿ —
ವಿಸ್ತರೇತಿ ।
ಜ್ಞಾನಮಾರ್ಗಸ್ಯ ಸೂಕ್ಷ್ಮತ್ವೇ ಹೇತುಮಾಹ —
ದುರ್ವಿಜ್ಞೇಯತ್ವಾದಿತಿ ।
ವಿಸ್ತೀರ್ಣತ್ವಂ ಪೂರ್ಣವಸ್ತುವಿಷಯತ್ವಾದವಧೇಯಮ್ ।
ಮಾಧ್ಯಂದಿನಶ್ರುತಿಮಾಶ್ರಿತ್ಯಾಽಽಹ —
ವಿಸ್ಪಷ್ಟೇತಿ ।
ಪ್ರಯತ್ನಸಾಧ್ಯತ್ವಂ ತಸ್ಯ ಪಂಚಮ್ಯಾ ವಿವಕ್ಷ್ಯತೇ ।
ಕಥಂ ಪುನರಧುನಾತನೋ ವೈದಿಕೋ ಜ್ಞಾನಮಾರ್ಗಶ್ಚಿರಂತನೋ ನಿರುಚ್ಯತೇ ತತ್ರಾಽಽಹ —
ನಿತ್ಯೇತಿ ।
ವಿಶೇಷಣಪ್ರಕಾಶಿತಮರ್ಥಮುಕ್ತ್ವಾ ತಸ್ಯ ವ್ಯವಚ್ಛೇದ್ಯಮಾಹ —
ನ ತಾರ್ಕಿಕೇತಿ ।
ಮಂತ್ರದೃಶಾ ಲಬ್ಧತ್ವೇಽಪಿ ಕುತೋ ಜ್ಞಾನಮಾರ್ಗಸ್ಯ ತತ್ಸಂಸ್ಪರ್ಶಿತ್ವಮಿತ್ಯಾಶಂಕ್ಯಾಽಽಹ —
ಯೋ ಹೀತಿ ।
ಅನುವೇದನಲಾಭಯೋರ್ವಿಶೇಷಾಭಾವಾತ್ಪೌನರುಕ್ತ್ಯಮಾಶಂಕ್ಯಾಽಽಹ —
ಅನುವೇದನಮಿತಿ ।
ಪೂರ್ವಶಬ್ದೇನ ಪಾಠಕ್ರಮಾನುಸಾರೇಣ ಲಾಭೋ ಗೃಹ್ಯತೇ । ಏವಕಾರಮಾಶ್ರಿತ್ಯ ಶಂಕತೇ —
ಕಿಮಸಾವಿತಿ ।
ತಥಾ ಚ ತದ್ಯೋ ಯೋ ದೇವಾನಾಮಿತ್ಯಾದ್ಯವಿಶೇಷಶ್ರುತಿರ್ವಿರುಧ್ಯೇತೇತಿ ಶೇಷಃ ।
ಅವಧಾರಣಶ್ರುತೇರನ್ಯಪರತ್ವೇನಾನ್ಯಯೋಗವ್ಯವಚ್ಛೇದಕಾಭಾವಮಭಿಪ್ರೇತ್ಯ ಪರಿಹರತಿ —
ನೈಷ ದೋಷ ಇತಿ ।
ಸ್ತುತಿಪರತ್ವಮೇವ ಪ್ರಕಟಯತಿ —
ಏವಂ ಹೀತಿ ।
ಕೃತಾರ್ಥೋಽಸ್ಮೀತ್ಯಾತ್ಮನ್ಯಭಿಮಾನಕರಂ ಸ್ವಾನುಭವಸಿದ್ಧಮಾತ್ಮಜ್ಞಾನಂ ನಾಸ್ಮಾದನ್ಯದುತ್ಕೃಷ್ಟಂ ಕಿಂಚಿದಿತ್ಯೇವಂ ವಿದ್ಯಾಮವಧಾರಣಶ್ರುತಿಃ ಸ್ತೌತೀತ್ಯರ್ಥಃ ।
ಯಥಾಶ್ರುತಾರ್ಥತ್ವೇ ಕೋ ದೋಷಃ ಸ್ಯಾದಿತಿ ಚೇತ್ತತ್ರಾಽಽಹ —
ನನ್ವಿತಿ ।
ಇತ್ಯವಧಾರಣಶ್ರುತ್ಯಾ ವಿವಕ್ಷಿತಮಿತಿ ಶೇಷಃ ।
ತತ್ರ ಹೇತುಃ —
ತದ್ಯೋ ಯ ಇತಿ ।
ಸರ್ವಾರ್ಥಶ್ರುತೇರ್ಬ್ರಹ್ಮವಿದ್ಯಾ ಸರ್ವಾರ್ಥಾ ಸರ್ವಸಾಧಾರಣೀತಿ ಶ್ರವಣಾದಿತಿ ಯಾವತ್ ।
ಬ್ರಹ್ಮವಿದ್ಯಾಯಾಃ ಸರ್ವಾರ್ಥತ್ವೇ ವಾಕ್ಯಶೇಷಂ ಪ್ರಮಾಣತ್ವೇನಾವತಾರ್ಯ ವ್ಯಾಚಷ್ಟೇ —
ತದೇವೇತಿ ।
ನನು ಮೋಕ್ಷೇ ಸ್ವರ್ಗಶಬ್ದೋ ನ ಯುಜ್ಯತೇ ತಸ್ಯಾರ್ಥಾಂತರೇ ರೂಢತ್ವಾದತ ಆಹ —
ಸ್ವರ್ಗೇತಿ ।
ಯಥಾ ಜ್ಯೋತಿಷ್ಟೋಮಪ್ರಕರಣೇ ಶ್ರುತೋ ಜ್ಯೋತಿಃಶಬ್ದೋ ಜ್ಯೋತಿಷ್ಟೋಮವಿಷಯಸ್ತಥಾ ಮೋಕ್ಷಪ್ರಕರಣೇ ಶ್ರುತಃ ಸ್ವರ್ಗಶಬ್ದೋ ಮೋಕ್ಷಮಧಿಕರೋತಿ । ರೂಢ್ಯಂಗೀಕಾರೇ ಬ್ರಹ್ಮವಿದ್ಯಾಯಾ ನಿಕರ್ಷಪ್ರಸಂಗಾದಿತಿ ಭಾವಃ । ಜೀವಂತ ಏವ ಮುಕ್ತಾಃ ಸಂತಃ ಶರೀರಪಾತಾದೂರ್ಧ್ವಂ ಮೋಕ್ಷಮಪಿಯಂತೀತಿ ಸಂಬಂಧಃ ॥ ೮ ॥