అన్ధమ్ అదర్శనాత్మకం తమః సంసారనియామకం ప్రవిశన్తి ప్రతిపద్యన్తే ; కే ? యే అవిద్యాం విద్యాతోఽన్యాం సాధ్యసాధనలక్షణామ్ , ఉపాసతే, కర్మ అనువర్తన్త ఇత్యర్థః ; తతః తస్మాదపి భూయ ఇవ బహుతరమివ తమః ప్రవిశన్తి ; కే ? యే ఉ విద్యాయామ్ అవిద్యావస్తుప్రతిపాదికాయాం కర్మార్థాయాం త్రయ్యామేవ విద్యాయామ్ , రతా అభిరతాః ; విధిప్రతిషేధపర ఎవ వేదః, నాన్యోఽస్తి — ఇతి, ఉపనిషదర్థానపేక్షిణ ఇత్యర్థః ॥