యది తే అదర్శనలక్షణం తమః ప్రవిశన్తి, కో దోష ఇత్యుచ్యతే — అనన్దాః అనానన్దాః అసుఖా నామ తే లోకాః, తేన అన్ధేనాదర్శనలక్షణేన తమసా ఆవృతాః వ్యాప్తాః, — తే తస్య అజ్ఞానతమసో గోచరాః ; తాన్ తే ప్రేత్య మృత్వా అభిగచ్ఛన్తి అభియాన్తి ; కే ? యే అవిద్వాంస ; కిం సామాన్యేన అవిద్వత్తామాత్రేణ ? నేత్యుచ్యతే — అబుధః, బుధేః అవగమనార్థస్య ధాతోః క్విప్ప్రత్యయాన్తస్య రూపమ్ , ఆత్మావగమవర్జితా ఇత్యర్థః ; జనాః ప్రాకృతా ఎవ జననధర్మాణో వా ఇత్యేతత్ ॥