ಉಕ್ತಾತ್ಮಜ್ಞಾನಸ್ತುತ್ಯರ್ಥಮೇವ ತನ್ನಿಷ್ಠಸ್ಯ ಕಾಯಕ್ಲೇಶರಾಹಿತ್ಯಂ ದರ್ಶಯತಿ —
ಆತ್ಮಾನಮಿತ್ಯಾದಿನಾ ।
ವಿಜ್ಞಾನಾತ್ಮನೋ ವೈಲಕ್ಷಣ್ಯಾರ್ಥಂ ವಿಶಿನಷ್ಟಿ —
ಸರ್ವೇತಿ ।
ತಾಟಸ್ಥ್ಯಂ ವ್ಯಾವರ್ತಯತಿ —
ಹೃತ್ಸ್ಥಮಿತಿ ।
ಬುದ್ಧಿಸಂಬಂಧಪ್ರಾಪ್ತಂ ಸಂಸಾರಿತ್ವಂ ವಾರಯತಿ —
ಅಶನಾಯಾದೀತಿ ।
ಪ್ರಶ್ನಪೂರ್ವಕಂ ಜ್ಞಾನಪ್ರಕಾರಂ ಪ್ರಕಟಯತಿ —
ಕಥಮಿತ್ಯಾದಿನಾ ।
ಸರ್ವಭೂತಸಂಬಂಧಪ್ರಯುಕ್ತಂ ದೋಷಂ ವಾರಯಿತುಂ ವಿಶಿನಷ್ಟಿ —
ನಿತ್ಯೇತಿ ।
ಇತಿ ವಿಜಾನೀಯಾದಿತಿ ಸಂಬಂಧಃ । ಪ್ರಯೋಜನಾಯ ಶರೀರಮನುಸಂಜ್ವರೇದಿತಿ ಸಂಬಂಧಃ ।
ಕಿಮಿಚ್ಛನ್ನಿತ್ಯಾಕ್ಷೇಪಂ ಸಮರ್ಥಯತೇ —
ನ ಹೀತಿ ।
ಕಸ್ಯ ವಾ ಕಾಮಾಯೇತ್ಯಾಕ್ಷೇಪಮುಪಪಾದಯತಿ —
ನ ಚೇತಿ ।
ಆಕ್ಷೇಪದ್ವಯಂ ನಿಗಮಯತಿ —
ಅತ ಇತಿ ।
ತದೇವ ಸ್ಪಷ್ಟಯತಿ —
ಶರೀರೇತಿ ।
ವಿದುಷಸ್ತಾಪಾಭಾವಂ ವ್ಯತಿರೇಕಮುಖೇನ ವಿಶದಯತಿ —
ಅನಾತ್ಮೇತಿ ।
ವಸ್ತ್ವಂತರೇಪ್ಸೋಸ್ತಾಪಸಂಭವ ಇತಿ ಶೇಷಃ । ಸ ಚೇತ್ಯಧ್ಯಾಹೃತ್ಯ ಮಮೇದಮಿತ್ಯಾದಿ ಯೋಜ್ಯಮ್ । ಇತ್ಯೇತದಾಹ ಕಿಮಿಚ್ಛನ್ನಿತ್ಯಾದ್ಯಾ ಶ್ರುತಿರಿತಿ ಶೇಷಃ ॥ ೧೨ ॥