अद्वैतशारदा | दक्षिणाम्नाय श्रीशारदापीठम्, शृङ्गेरी

ಯಸ್ಮಿನ್ಪಂಚ ಪಂಚಜನಾ ಆಕಾಶಶ್ಚ ಪ್ರತಿಷ್ಠಿತಃ । ತಮೇವ ಮನ್ಯ ಆತ್ಮಾನಂ ವಿದ್ವಾನ್ಬ್ರಹ್ಮಾಮೃತೋಽಮೃತಮ್ ॥ ೧೭ ॥

ಕಿಂ ಚ ಯಸ್ಮಿನ್ ಯತ್ರ ಬ್ರಹ್ಮಣಿ, ಪಂಚ ಪಂಚಜನಾಃ — ಗಂಧರ್ವಾದಯಃ ಪಂಚೈವ ಸಂಖ್ಯಾತಾಃ ಗಂಧರ್ವಾಃ ಪಿತರೋ ದೇವಾ ಅಸುರಾ ರಕ್ಷಾಂಸಿ — ನಿಷಾದಪಂಚಮಾ ವಾ ವರ್ಣಾಃ, ಆಕಾಶಶ್ಚ ಅವ್ಯಾಕೃತಾಖ್ಯಃ — ಯಸ್ಮಿನ್ ಸೂತ್ರಮ್ ಓತಂ ಚ ಪ್ರೋತಂ ಚ — ಯಸ್ಮಿನ್ಪ್ರತಿಷ್ಠಿತಃ ; ‘ಏತಸ್ಮಿನ್ನು ಖಲ್ವಕ್ಷರೇ ಗಾರ್ಗ್ಯಾಕಾಶಃ’ (ಬೃ. ಉ. ೩ । ೮ । ೧೧) ಇತ್ಯುಕ್ತಮ್ ; ತಮೇವ ಆತ್ಮಾನಮ್ ಅಮೃತಂ ಬ್ರಹ್ಮ ಮನ್ಯೇ ಅಹಮ್ , ನ ಚಾಹಮಾತ್ಮಾನಂ ತತೋಽನ್ಯತ್ವೇನ ಜಾನೇ । ಕಿಂ ತರ್ಹಿ ? ಅಮೃತೋಽಹಮ್ ಬ್ರಹ್ಮ ವಿದ್ವಾನ್ಸನ್ ; ಅಜ್ಞಾನಮಾತ್ರೇಣ ತು ಮರ್ತ್ಯೋಽಹಮ್ ಆಸಮ್ ; ತದಪಗಮಾತ್ ವಿದ್ವಾನಹಮ್ ಅಮೃತ ಏವ ॥

ಕಿಂಚೇತಿ ; ನ ಚೇತಿ ; ಕಿಂ ತರ್ಹೀತಿ ; ಅಜ್ಞಾನಮಾತ್ರೇಣೇತಿ ॥ ೧೭ ॥ ;

ಜ್ಯೋತಿಷಾಂ ಜ್ಯೋತಿರಮೃತಮಿತ್ಯುಕ್ತಂ ತಸ್ಯಾಮೃತತ್ವಂ ಸರ್ವಾಧಿಷ್ಠಾನತ್ವೇನ ಸಾಧಯತಿ —

ಕಿಂಚೇತಿ ।

ಏವಕಾರಾರ್ಥಮಾಹ —

ನ ಚೇತಿ ।

ಯದ್ಯಾತ್ಮಾನಂ ಬ್ರಹ್ಮ ಜಾನಾಸಿ ತರ್ಹಿ ಕಿಂ ತೇ ತದ್ವಿದ್ಯಾಫಲಮಿತಿ ಪ್ರಶ್ನಪೂರ್ವಕಮಾಹ —

ಕಿಂ ತರ್ಹೀತಿ ।

ಕಥಂ ತರ್ಹಿ ತೇ ಮರ್ತ್ಯತ್ವಪ್ರತೀತಿಸ್ತತ್ರಾಽಽಹ —

ಅಜ್ಞಾನಮಾತ್ರೇಣೇತಿ ॥ ೧೭ ॥