కిం చ యస్మిన్ యత్ర బ్రహ్మణి, పఞ్చ పఞ్చజనాః — గన్ధర్వాదయః పఞ్చైవ సఙ్ఖ్యాతాః గన్ధర్వాః పితరో దేవా అసురా రక్షాంసి — నిషాదపఞ్చమా వా వర్ణాః, ఆకాశశ్చ అవ్యాకృతాఖ్యః — యస్మిన్ సూత్రమ్ ఓతం చ ప్రోతం చ — యస్మిన్ప్రతిష్ఠితః ; ‘ఎతస్మిన్ను ఖల్వక్షరే గార్గ్యాకాశః’ (బృ. ఉ. ౩ । ౮ । ౧౧) ఇత్యుక్తమ్ ; తమేవ ఆత్మానమ్ అమృతం బ్రహ్మ మన్యే అహమ్ , న చాహమాత్మానం తతోఽన్యత్వేన జానే । కిం తర్హి ? అమృతోఽహమ్ బ్రహ్మ విద్వాన్సన్ ; అజ్ఞానమాత్రేణ తు మర్త్యోఽహమ్ ఆసమ్ ; తదపగమాత్ విద్వానహమ్ అమృత ఎవ ॥