ತಮ್ ಈದೃಶಮಾತ್ಮಾನಮೇವ, ಧೀರಃ ಧೀಮಾನ್ ವಿಜ್ಞಾಯ ಉಪದೇಶತಃ ಶಾಸ್ತ್ರತಶ್ಚ, ಪ್ರಜ್ಞಾಂ ಶಾಸ್ತ್ರಾಚರ್ಯೋಪದಿಷ್ಟವಿಷಯಾಂ ಜಿಜ್ಞಾಸಾಪರಿಸಮಾಪ್ತಿಕರೀಮ್ , ಕುರ್ವೀತ ಬ್ರಾಹ್ಮಣಃ — ಏವಂ ಪ್ರಜ್ಞಾಕರಣಸಾಧನಾನಿ ಸನ್ನ್ಯಾಸಶಮದಮೋಪರಮತಿತಿಕ್ಷಾಸಮಾಧಾನಾನಿ ಕುರ್ಯಾದಿತ್ಯರ್ಥಃ । ನ ಅನುಧ್ಯಾಯಾತ್ ನಾನುಚಿಂತಯೇತ್ , ಬಹೂನ್ ಪ್ರಭೂತಾನ್ ಶಬ್ದಾನ್ ; ತತ್ರ ಬಹುತ್ವಪ್ರತಿಷೇಧಾತ್ ಕೇವಲಾತ್ಮೈಕತ್ವಪ್ರತಿಪಾದಕಾಃ ಸ್ವಲ್ಪಾಃ ಶಬ್ದಾ ಅನುಜ್ಞಾಯಂತೇ ; ‘ಓಮಿತ್ಯೇವಂ ಧ್ಯಾಯಥ ಆತ್ಮಾನಮ್’ (ಮು. ಉ. ೨ । ೨ । ೬) ‘ಅನ್ಯಾ ವಾಚೋ ವಿಮುಂಚಥ’ (ಮು. ಉ. ೨ । ೨ । ೫) ಇತಿ ಚ ಆಥರ್ವಣೇ । ವಾಚೋ ವಿಗ್ಲಾಪನಂ ವಿಶೇಷೇಣ ಗ್ಲಾನಿಕರಂ ಶ್ರಮಕರಮ್ , ಹಿ ಯಸ್ಮಾತ್ , ತತ್ ಬಹುಶಬ್ದಾಭಿಧ್ಯಾನಮಿತಿ ॥