సార్థవాదం పారివ్రాజ్యం వ్యాఖ్యాయ స ఎష ఇత్యాది వ్యాకర్తుం శఙ్కయతి —
యదీతి ।
పరిహరతి —
అత్రేతి ।
తదర్థినో నాఽఽరభన్తే కర్మాణీతి శేషః ।
కర్మభిరసంబన్ధమాత్మలోకస్య సాధయతి —
యమాత్మానమితి ।
తస్య కర్మాసంబన్ధే నిష్ప్రపఞ్చత్వం ఫలితమాహ —
తస్మాదితి ।
ఆత్మనో నిష్ప్రపఞ్చత్వేఽపి కథం తదర్థినాం పారివ్రాజ్యసిద్ధిరిత్యాశఙ్క్యాఽఽహ —
యస్మాదితి ।
నిర్విశేషస్తత్ర తత్ర వాక్యే దర్శితస్వరూపోఽయమాత్మేత్యేతదాగమోపపత్తిభ్యాం యథా పూర్వత్ర స్థాపితం తథైవాత్రాపి బ్రాహ్మణద్వయే విశేషతో యస్మాన్నిర్ధారితం తస్మాదస్మిన్నాత్మన్యాపాతతో జ్ఞాతే కర్మానుష్ఠానప్రయత్నాసిద్ధిరితి యోజనా ।
ఉక్తాత్మవిషయవివేకవిజ్ఞానవతో న కర్మానుష్ఠానమిత్యత్ర దృష్టాన్తమాహ —
న హీతి ।
బ్రహ్మజ్ఞానఫలే సర్వకర్మఫలాన్తర్భావాచ్చ తదర్థినో ముముక్షోర్న కర్తవ్యం కర్మేత్యాహ —
కృత్స్నస్యేతి ।
తథాఽపి విచిత్రఫలాని కర్మాణీతి వివేకీ కుతూహలవశాదనుష్ఠాస్యతీత్యాశఙ్క్యాఽఽహ —
న చేతి ।
తత్ర లౌకికం న్యాయం దర్శయతి —
అఙ్కే చేదితి ।
పురోదేశే మధు లభేత చేదితి యావత్ ।
జ్ఞానఫలే కర్మఫలాన్తర్భావే మానమాహ —
సర్వమితి ।
అఖిలం సమగ్రాఙ్గోపేతమిత్యర్థః ।
తత్రైవ శ్రుతిం సంవాదయతి —
ఇహాపీతి ।
నిషేధవాక్యతాత్పర్యముపసంహరతి —
అత ఇతి ।