ಯೋಽಯಂ ಜನಕಯಾಜ್ಞವಲ್ಕ್ಯಾಖ್ಯಾಯಿಕಾಯಾಂ ವ್ಯಾಖ್ಯಾತ ಆತ್ಮಾ ಸ ವೈ ಏಷಃ ಮಹಾನ್ ಅಜಃ ಆತ್ಮಾ ಅನ್ನಾದಃ ಸರ್ವಭೂತಸ್ಥಃ ಸರ್ವಾನ್ನಾನಾಮತ್ತಾ, ವಸುದಾನಃ — ವಸು ಧನಂ ಸರ್ವಪ್ರಾಣಿಕರ್ಮಫಲಮ್ — ತಸ್ಯ ದಾತಾ, ಪ್ರಾಣಿನಾಂ ಯಥಾಕರ್ಮ ಫಲೇನ ಯೋಜಯಿತೇತ್ಯರ್ಥಃ ; ತಮೇತತ್ ಅಜಮನ್ನಾದಂ ವಸುದಾನಮಾತ್ಮಾನಮ್ ಅನ್ನಾದವಸುದಾನಗುಣಾಭ್ಯಾಂ ಯುಕ್ತಮ್ ಯೋ ವೇದ, ಸಃ ಸರ್ವಭೂತೇಷ್ವಾತ್ಮಭೂತಃ ಅನ್ನಮತ್ತಿ, ವಿಂದತೇ ಚ ವಸು ಸರ್ವಂ ಕರ್ಮಫಲಜಾತಂ ಲಭತೇ ಸರ್ವಾತ್ಮತ್ವಾದೇವ, ಯ ಏವಂ ಯಥೋಕ್ತಂ ವೇದ । ಅಥವಾ ದೃಷ್ಟಫಲಾರ್ಥಿಭಿರಪಿ ಏವಂಗುಣ ಉಪಾಸ್ಯಃ ; ತೇನ ಅನ್ನಾದಃ ವಸೋಶ್ಚ ಲಬ್ಧಾ, ದೃಷ್ಟೇನೈವ ಫಲೇನ ಅನ್ನಾತ್ತೃತ್ವೇನ ಗೋಶ್ವಾದಿನಾ ಚ ಅಸ್ಯ ಯೋಗೋ ಭವತೀತ್ಯರ್ಥಃ ॥