ನಿರುಪಾಧಿಕಬ್ರಹ್ಮಜ್ಞಾನಾನ್ಮುಕ್ತಿರುಕ್ತಾ ಸೋಪಾಧಿಕಬ್ರಹ್ಮಧ್ಯಾನಾಚ್ಚಾಭ್ಯುದಯ ಉಕ್ತಸ್ತಥಾ ಚ ಕಿಮುತ್ತರಕಂಡಿಕಯೇತ್ಯಾಶಂಕ್ಯಾಽಽಹ —
ಇದಾನೀಮಿತಿ ।
ಅಜತ್ವಾಚ್ಚಾವಿನಾಶೀತಿ ವಕ್ತುಂ ಚಶಬ್ದಃ ।
ಕಥಂ ಜನ್ಮಜರಾಭಾವಯೋರಮರತ್ವಾವಿನಾಶಿತ್ವಸಾಧಕತ್ವಂ ತದಾಹ —
ಯೋ ಹೀತಿ ।
ಅಯಂ ತ್ವಜತ್ವಾದವಿನಾಶ್ಯಜರತ್ವಾಚ್ಚಾಮರೋಽಮರತ್ವಾಚ್ಚಾವಿನಾಶೀತಿ ಯೋಜನಾ ।
ಮರಣಾಯೋಗ್ಯತ್ವಮುಪಜೀವ್ಯ ಮರಣಕಾರ್ಯಾಭಾವಂ ದರ್ಶಯತಿ —
ಅತ ಏವೇತಿ ।
ಜನ್ಮಾಪಕ್ಷಯವಿನಾಶಾನಾಮೇವ ಭಾವವಿಕಾರಾಣಾಮಿಹ ಮುಖತೋ ನಿಷೇಧಾದ್ವಿವೃದ್ಧ್ಯಾದೀನಿ ವಿಕಾರಾಂತರಾಣ್ಯಾತ್ಮನಿ ಭವಿಷ್ಯನ್ನಿತಿ ವಿಶೇಷನಿಷೇಧಸ್ಯ ಶೇಷಾಭ್ಯನುಜ್ಞಾಪರತ್ವಾದಿತ್ಯಾಶಂಕ್ಯಾಽಽಹ —
ಯಸ್ಮಾದಿತಿ ।
ಇತರೇ ಸತ್ತ್ವವಿವೃದ್ಧಿವಿಪರಿಣಾಮಾಃ ।
ಅತ ಏವಾಭಯ ಇತ್ಯುಕ್ತಂ ವಿವೃಣೋತಿ —
ಯಸ್ಮಾಚ್ಚೇತಿ ।
ಕಿಂ ತದ್ಭಯಂ ತದಾಹ —
ಭಯಂ ಚೇತಿ ।
ಅವಿದ್ಯಾನಿಷೇಧಿವಿಷೇಶಣಾಭಾವಾದಾತ್ಮಾನಂ ಸಾ ಸದಾ ಸ್ಪೃಶತೀತ್ಯಾಶಂಕ್ಯಾಽಽಹ —
ತತ್ಕಾರ್ಯೇತಿ ।
ವಿಶೇಷಣಾಂತರಂ ಪ್ರಶ್ನಪೂರ್ವಕಮುತ್ಥಾಪ್ಯ ವ್ಯಾಕರೋತಿ —
ಅಭಯ ಇತಿ ।
ಕಥಂ ಪುನರಭಯಗುಣವಿಶಿಷ್ಟಸ್ಯಾಽತ್ಮನೋ ಬ್ರಹ್ಮತ್ವಂ ತದಾಹ —
ಅಭಯಮಿತಿ ।
ವೈಶಬ್ದಾರ್ಥಮಾಹ —
ಪ್ರಸಿದ್ಧಮಿತಿ ।
ಲೋಕಶಬ್ದಃ ಶಾಸ್ತ್ರಸ್ಯಾಪ್ಯುಪಲಕ್ಷಣಮ್ ।
ವೇದ್ಯಸ್ವರೂಪಮುಕ್ತ್ವಾ ವಿದ್ಯಾಫಲಂ ಕಥಯತಿ —
ಯ ಏವಮಿತಿ ।
ಕಂಡಿಕಾರ್ಥಮುಪಸಂಹರತಿ —
ಏಷ ಇತಿ ।
ಸೃಷ್ಟ್ಯಾದೇರಪಿ ತದರ್ಥತ್ವಾತ್ಕಿಮಿತ್ಯಸಾವಿಹ ನೋಪಸಂಹ್ರಿಯತೇ —
ಏತಸ್ಯೇತಿ ।
ಸೃಷ್ಟ್ಯಾದೇರಾರೋಪಿತತ್ವೇ ಗಮಕಮಾಹ —
ತದಪೋಹೇನೇತಿ ।
ತಚ್ಛಬ್ದಃ ಸೃಷ್ಟ್ಯಾದಿಪ್ರಪಂಚವಿಷಯಃ ।
ತದಪೋಹೇನೇತಿ ಯದುಕ್ತಂ ತದೇವ ಸ್ಫುಟಯತಿ —
ನೇತೀತಿ ।
ಅಧ್ಯಾರೋಪಾಪವಾದನ್ಯಾಯೇನ ತತ್ತ್ವಸ್ಯಾಽಽವೇದಿತತ್ತ್ವಾದಾರೋಪಿತಂ ಭವತ್ಯೇವ ಸೃಷ್ಟ್ಯಾದಿದ್ವೈತಮಿತ್ಯರ್ಥಃ ।
ಅಧ್ಯಾರೋಪಾಪವಾದನ್ಯಾಯಸ್ಯ ಪಂಕಪ್ರಕ್ಷಾಲನನ್ಯಾಯವಿರುದ್ಧತ್ವಾತ್ತತ್ತ್ವಂ ವಿವಕ್ಷಿತಂ ಚೇತ್ತದೇವೋಚ್ಯತಾಂ ಕೃತಂ ಸೃಷ್ಟ್ಯಾದಿದ್ವೈತಾರೋಪೇಣೇತ್ಯಾಶಂಕ್ಯಾಽಽಹ —
ಯಥೇತಿ ।
ಉದಾಹರಣಾಂತರಮಾಹ —
ಯಥಾ ಚೇತಿ ।
ದೃಷ್ಟಾಂತದ್ವಯಮನೂದ್ಯ ದಾರ್ಷ್ಟಾಂತಿಕಮಾಚಷ್ಟೇ —
ತಥಾ ಚೇತಿ ।
ಇಹೇತಿ ಮೋಕ್ಷಶಾಸ್ತ್ರೋಕ್ತಿಃ । ತಥಾಽಪಿ ಕಲ್ಪಿತಪ್ರಪಂಚಸಂಬಂಧಪ್ರಯುಕ್ತಂ ಸವಿಶೇಷತ್ವಂ ಬ್ರಹ್ಮಣಃ ಸ್ಯಾದಿತ್ಯಾಶಂಕ್ಯಾಽಽಹ —
ಪುನರಿತಿ ।
ತಸ್ಮಿನ್ನಾತ್ಮನಿ ಕಲ್ಪಿತಃ ಸೃಷ್ಟ್ಯಾದಿರುಪಾಯಸ್ತೇನ ಜನಿತೋ ವಿಶೇಷಸ್ತಸ್ಮಿನ್ಕಾರಣತ್ವಾದಿಸ್ತಸ್ಯ ನಿರಾಸಾರ್ಥಮಿತಿ ಯಾವತ್ ।
ತರ್ಹಿ ದ್ವೈತಾಭಾವವಿಶಿಷ್ಟಂ ತತ್ತ್ವಮಿತಿ ಚೇನ್ನೇತ್ಯಾಹ —
ತದುಪಸಂಹೃತಮಿತಿ ।
ಪರಿಶುದ್ಧಂ ಭಾವವದಭಾವೇನಾಪಿ ನ ಸಂಸ್ಪೃಷ್ಟಮಿತ್ಯರ್ಥಃ । ಕೇವಲಮಿತ್ಯದ್ವಿತೀಯೋಕ್ತಿಃ ।
ಸೃಷ್ಟ್ಯಾದಿವಚನಸ್ಯ ಗತಿಮುಕ್ತ್ವಾ ಪ್ರಕೃತಮುಪಸಂಹರತಿ —
ಸಫಲಮಿತಿ ।
ಇತಿಶಬ್ದಃ ಸಂಗ್ರಹಸಮಾಪ್ತ್ಯರ್ಥೋ ಬ್ರಾಹ್ಮಣಸಮಾಪ್ತ್ಯರ್ಥೋ ವಾ ॥ ೨೫ ॥