సా హోవాచ — అత్రైవ మా భగవాన్ ఎతస్మిన్నేవ వస్తుని ప్రజ్ఞానఘన ఎవ, న ప్రేత్య సంజ్ఞాస్తీతి, మోహాన్తం మోహమధ్యమ్ , ఆపీపిపత్ ఆపీపదత్ అవగమితవానసి, సమ్మోహితవానసీత్యర్థః ; అతః న వా అహమ్ ఇమమాత్మానమ్ ఉక్తలక్షణం విజానామి వివేకత ఇతి । స హోవాచ — నాహం మోహం బ్రవీమి, అవినాశీ వా అరేఽయమాత్మా యతః ; విననం శీలమస్యేతి వినాశీ, న వినాశీ అవినాశీ, వినాశశబ్దేన విక్రియా, అవినాశీతి అవిక్రియ ఆత్మేత్యర్థః ; అరే మైత్రేయి, అయమాత్మా ప్రకృతః అనుచ్ఛిత్తధర్మా ; ఉచ్ఛిత్తిరుచ్ఛేదః, ఉచ్ఛేదః అన్తః వినాశః, ఉచ్ఛిత్తిః ధర్మః అస్య ఇతి ఉచ్ఛిత్తిధర్మా, న ఉచ్ఛిత్తిధర్మా అనుచ్ఛిత్తిధర్మా, నాపి విక్రియాలక్షణః, నాప్యుచ్ఛేదలక్షణః వినాశః అస్య విద్యత ఇత్యర్థః ॥