ಸಾರ್ಥವಾದೇನ ವಿಧಿನಾ ಸಿದ್ಧಮರ್ಥಮನುವದತಿ —
ದಮಾದೀತಿ ।
ಕಥಂ ತಸ್ಯ ಸರ್ವೋಪಾಸನಶೇಷತ್ವಂ ತದಾಹ —
ದಾಂತ ಇತಿ ।
ಅಲುಬ್ಧ ಇತಿ ಚ್ಛೇದಃ ಸಂಪ್ರತ್ಯುತ್ತರಸಂದರ್ಭಸ್ಯ ತಾತ್ಪರ್ಯಂ ವಕ್ತುಂ ಭೂಮಿಕಾಂ ಕರೋತಿ —
ತತ್ರೇತಿ ।
ಕಾಂಡದ್ವಯಂ ಸಪ್ತಮ್ಯರ್ಥಃ ।
ಅನಂತರಸಂದರ್ಭಸ್ಯ ತಾತ್ಪರ್ಯಮಾಹ —
ಅಥೇತಿ ।
ಪಾಪಕ್ಷಯಾದಿರಭ್ಯುದಯಸ್ತತ್ಫಲಾನ್ಯುಪಾಸನಾನೀತಿ ಶೇಷಃ ।
ಅನಂತರಬ್ರಾಹ್ಮಣಮಾದಾಯ ತಸ್ಯ ಸಂಗತಿಮಾಹ —
ಏಷ ಇತ್ಯಾದಿನಾ ।
ಉಕ್ತಸ್ಯ ಹೃದಯಶಬ್ದಾರ್ಥಸ್ಯ ಪಾಂಚಮಿಕತ್ವಂ ದರ್ಶಯನ್ಪ್ರಜಾಪತಿತ್ವಂ ಸಾಧಯತಿ —
ಯಸ್ಮಿನ್ನಿತಿ ।
ಕಥಂ ಹೃದಯಸ್ಯ ಸರ್ವತ್ವಂ ತದಾಹ —
ಉಕ್ತಮಿತಿ ।
ಸರ್ವತ್ವಸಂಕೀರ್ತನಫಲಮಾಹ —
ತತ್ಸರ್ವಮಿತಿ ।
ತತ್ರ ಹೃದಯಸ್ಯೋಪಾಸ್ಯತ್ವೇ ಸಿದ್ಧೇ ಸತೀತ್ಯೇತತ್ ।
ಫಲೋಕ್ತಿಮುತ್ಥಾಪ್ಯ ವ್ಯಾಕರೋತಿ —
ಅಭಿಹರಂತೀತಿ ।
ಯೋ ವೇದಾಸ್ಮೈ ವಿದುಷೇಽಭಿಹಂತೀತಿ ಸಂಬಂಧಃ ।
ವೇದನಮೇವ ವಿಶದಯತಿ —
ಯಸ್ಮಾದಿತ್ಯಾದಿನಾ ।
ಸ್ವಂ ಕಾರ್ಯಂ ರೂಪದರ್ಶನಾದಿ । ಹೃದಯಸ್ಯ ತು ಕಾರ್ಯಮ್ । ಸುಖಾದಿ । ಅಸಂಬದ್ಧಾ ಜ್ಞಾತಿವ್ಯತಿರಿಕ್ತಾಃ ।
ಔಚಿತ್ಯಮುಕ್ತೇ ಫಲೇ ಕಥಯತಿ —
ವಿಜ್ಞಾನೇತಿ ।
ಅತ್ರಾಪೀತಿ ದಕಾರಾಕ್ಷರೋಪಾಸನೇಽಪಿ ಫಲಮುಚ್ಯತ ಇತಿ ಶೇಷಃ ।
ತಾಮೇವ ಫಲೋಕ್ತಿಂ ವ್ಯನಕ್ತಿ —
ಹೃದಯಾಯೇತಿ ।
ಅಸ್ಮೈ ವಿದುಷೇ ಸ್ವಾಶ್ಚಾನ್ಯೇ ಚ ದದತಿ । ಬಲಿಮಿತಿ ಶೇಷಃ ।
ನಾಮಾಕ್ಷರೋಪಾಸನಾನಿ ತ್ರೀಣಿ ಹೃದಯಸ್ವರೂಪೋಪಾಸನಮೇಕಮಿತಿ ಚತ್ವಾರ್ಯುಪಾಸಾನಾನ್ಯತ್ರ ವಿವಕ್ಷಿತಾನೀತ್ಯಾಶಂಕ್ಯಾಽಽಹ —
ಏವಮಿತಿ ॥೧॥