తస్యైవ హృదయాఖ్యస్య బ్రహ్మణః సత్యమిత్యుపాసనం విధిత్సన్నాహ — తత్ , తదితి హృదయం బ్రహ్మ పరామృష్టమ్ ; వై ఇతి స్మరణార్థమ్ ; తత్ యత్ హృదయం బ్రహ్మ స్మర్యత ఇత్యేకః తచ్ఛబ్దః ; తదేతదుచ్యతే ప్రకారాన్తరేణేతి ద్వితీయః తచ్ఛబ్దః । కిం పునః తత్ప్రకారాన్తరమ్ ? ఎతదేవ తదితి ఎతచ్ఛబ్దేన సమ్బధ్యతే తృతీయస్తచ్ఛబ్దః ; ఎతదితి వక్ష్యమాణం బుద్ధౌ సన్నిధీకృత్య ఆహ ; ఆస బభూవ ; కిం పునః ఎతదేవ ఆస ? యదుక్తం హృదయం బ్రహ్మేతి, తత్ ఇతి, తృతీయః తచ్ఛబ్దో వినియుక్తః । కిం తదితి విశేషతో నిర్దిశతి ; సత్యమేవ, సచ్చ త్యచ్చ మూర్తం చామూర్తం చ సత్యం బ్రహ్మ, పఞ్చభూతాత్మకమిత్యేతత్ । స యః కశ్చిత్ సత్యాత్మానమ్ ఎతమ్ , మహత్ మహత్త్వాత్ , యక్షం పూజ్యమ్ , ప్రథమజం ప్రథమజాతమ్ , సర్వస్మాత్సంసారిణ ఎతదేవాగ్రే జాతం బ్రహ్మ అతః ప్రథమజమ్ , వేద విజానాతి సత్యం బ్రహ్మేతి ; తస్యేదం ఫలముచ్యతే — యథా సత్యేన బ్రహ్మణా ఇమే లోకా ఆత్మసాత్కృతా జితాః, ఎవం సత్యాత్మానం బ్రహ్మ మహద్యక్షం ప్రథమజం వేద, స జయతి ఇమాన్ లోకాన్ ; కిం చ జితో వశీకృతః, ఇన్ను ఇత్థమ్ , యథా బ్రహ్మణా అసౌ శత్రురితి వాక్యశేషః । అసచ్చ అసద్భవేత్ అసౌ శత్రుః జితో భవేదిత్యర్థః । కస్య ఎతత్ఫలమితి పునర్నిగమయతి — య ఎవమేతన్మహద్యక్షం ప్రథమజం వేద సత్యం బ్రహ్మేతి । అతో విద్యానురూపం ఫలం యుక్తమ్ , సత్యం హ్యేవ యస్మాద్బ్రహ్మ ॥