ತಥೈವ ಉಪಾಸನಾಂತರಂ ಸತ್ಯಸ್ಯ ಬ್ರಹ್ಮಣೋ ವಿಶಿಷ್ಟಫಲಮಾರಭ್ಯತೇ — ವಿದ್ಯುದ್ಬ್ರಹ್ಮೇತ್ಯಾಹುಃ । ವಿದ್ಯುತೋ ಬ್ರಹ್ಮಣೋ ನಿರ್ವಚನಮುಚ್ಯತೇ — ವಿದಾನಾತ್ ಅವಖಂಡನಾತ್ ತಮಸೋ ಮೇಘಾಂಧಕಾರಂ ವಿದಾರ್ಯ ಹಿ ಅವಭಾಸತೇ, ಅತೋ ವಿದ್ಯುತ್ ; ಏವಂಗುಣಂ ವಿದ್ಯುತ್ ಬ್ರಹ್ಮೇತಿ ಯೋ ವೇದ, ಅಸೌ ವಿದ್ಯತಿ ಅವಖಂಡಯತಿ ವಿನಾಶಯತಿ ಪಾಪ್ಮನಃ, ಏನಮಾತ್ಮಾನಂ ಪ್ರತಿ ಪ್ರತಿಕೂಲಭೂತಾಃ ಪಾಪ್ಮಾನೋ ಯೇ ತಾನ್ ಸರ್ವಾನ್ ಪಾಪ್ಮನಃ ಅವಖಂಡಯತೀತ್ಯರ್ಥಃ । ಯ ಏವಂ ವೇದ ವಿದ್ಯುದ್ಬ್ರಹ್ಮೇತಿ ತಸ್ಯಾನುರೂಪಂ ಫಲಮ್ , ವಿದ್ಯುತ್ ಹಿ ಯಸ್ಮಾತ್ ಬ್ರಹ್ಮ ॥