ಪುನಃ ಉಪಾಸನಾಂತರಮ್ ತಸ್ಯೈವ ಬ್ರಹ್ಮಣಃ ವಾಗ್ವೈ ಬ್ರಹ್ಮೇತಿ ; ವಾಗಿತಿ ಶಬ್ದಃ ತ್ರಯೀ ; ತಾಂ ವಾಚಂ ಧೇನುಮ್ , ಧೇನುರಿವ ಧೇನುಃ, ಯಥಾ ಧೇನುಃ ಚತುರ್ಭಿಃ ಸ್ತನೈಃ ಸ್ತನ್ಯಂ ಪಯಃ ಕ್ಷರತಿ ವತ್ಸಾಯ ಏವಂ ವಾಗ್ಧೇನುಃ ವಕ್ಷ್ಯಮಾಣೈಃ ಸ್ತನೈಃ ಪಯ ಇವ ಅನ್ನಂ ಕ್ಷರತಿ ದೇವಾದಿಭ್ಯಃ । ಕೇ ಪುನಃ ತೇ ಸ್ತನಾಃ ? ಕೇ ವಾ ತೇ, ಯೇಭ್ಯಃ ಕ್ಷರತಿ ? ತಸ್ಯಾಃ ಏತಸ್ಯಾ ವಾಚೋ ಧೇನ್ವಾಃ, ದ್ವೌ ಸ್ತನೌ ದೇವಾ ಉಪಜೀವಂತಿ ವತ್ಸಸ್ಥಾನೀಯಾಃ ; ಕೌ ತೌ ? ಸ್ವಾಹಾಕಾರಂ ಚ ವಷಟ್ಕಾರಂ ಚ ; ಆಭ್ಯಾಂ ಹಿ ಹವಿಃ ದೀಯತೇ ದೇವೇಭ್ಯಃ । ಹಂತಕಾರಂ ಮನುಷ್ಯಾಃ ; ಹಂತೇತಿ ಮನುಷ್ಯೇಭ್ಯಃ ಅನ್ನಂ ಪ್ರಯಚ್ಛಂತಿ । ಸ್ವಧಾಕಾರಂ ಪಿತರಃ ; ಸ್ವಧಾಕಾರೇಣ ಹಿ ಪಿತೃಭ್ಯಃ ಸ್ವಧಾಂ ಪ್ರಯಚ್ಛಂತಿ । ತಸ್ಯಾ ಧೇನ್ವಾ ವಾಚಃ ಪ್ರಾಣಃ ಋಷಭಃ ; ಪ್ರಾಣೇನ ಹಿ ವಾಕ್ಪ್ರಸೂಯತೇ ; ಮನೋ ವತ್ಸಃ ; ಮನಸಾ ಹಿ ಪ್ರಸ್ರಾವ್ಯತೇ ; ಮನಸಾ ಹ್ಯಾಲೋಚಿತೇ ವಿಷಯೇ ವಾಕ್ ಪ್ರವರ್ತತೇ ; ತಸ್ಮಾತ್ ಮನಃ ವತ್ಸಸ್ಥಾನೀಯಮ್ । ಏವಂ ವಾಗ್ಧೇನೂಪಾಸಕಃ ತಾದ್ಭಾವ್ಯಮೇವ ಪ್ರತಿಪದ್ಯತೇ ॥