ಅಯಮಗ್ನಿರ್ವೈಶ್ವಾನರಃ, ಪೂರ್ವವದುಪಾಸನಾಂತರಮ್ ; ಅಯಮ್ ಅಗ್ನಿಃ ವೈಶ್ವಾನರಃ ; ಕೋಽಯಮಗ್ನಿರಿತ್ಯಾಹ — ಯೋಽಯಮಂತಃ ಪುರುಷೇ । ಕಿಂ ಶರೀರಾರಂಭಕಃ ? ನೇತ್ಯುಚ್ಯತೇ — ಯೇನ ಅಗ್ನಿನಾ ವೈಶ್ವಾನರಾಖ್ಯೇನ ಇದಮನ್ನಂ ಪಚ್ಯತೇ । ಕಿಂ ತದನ್ನಮ್ ? ಯದಿದಮ್ ಅದ್ಯತೇ ಭುಜ್ಯತೇ ಅನ್ನಂ ಪ್ರಜಾಭಿಃ, ಜಾಠರೋಽಗ್ನಿರಿತ್ಯರ್ಥಃ । ತಸ್ಯ ಸಾಕ್ಷಾದುಪಲಕ್ಷಣಾರ್ಥಮಿದಮಾಹ — ತಸ್ಯಾಗ್ನೇಃ ಅನ್ನಂ ಪಚತಃ ಜಾಠರಸ್ಯ ಏಷ ಘೋಷೋ ಭವತಿ ; ಕೋಽಸೌ ? ಯಂ ಘೋಷಮ್ , ಏತದಿತಿ ಕ್ರಿಯಾವಿಶೇಷಣಮ್ , ಕರ್ಣಾವಪಿಧಾಯ ಅಂಗುಲೀಭ್ಯಾಮಪಿಧಾನಂ ಕೃತ್ವಾ ಶೃಣೋತಿ । ತಂ ಪ್ರಜಾಪತಿಮುಪಾಸೀತ ವೈಶ್ವಾನರಮಗ್ನಿಮ್ । ಅತ್ರಾಪಿ ತಾದ್ಭಾವ್ಯಂ ಫಲಮ್ । ತತ್ರ ಪ್ರಾಸಂಗಿಕಮಿದಮರಿಷ್ಟಲಕ್ಷಣಮುಚ್ಯತೇ — ಸೋಽತ್ರ ಶರೀರೇ ಭೋಕ್ತಾ ಯದಾ ಉತ್ಕ್ರಮಿಷ್ಯನ್ಭವತಿ, ನೈನಂ ಘೋಷಂ ಶೃಣೋತಿ ॥