పునః ఉపాసనాన్తరమ్ తస్యైవ బ్రహ్మణః వాగ్వై బ్రహ్మేతి ; వాగితి శబ్దః త్రయీ ; తాం వాచం ధేనుమ్ , ధేనురివ ధేనుః, యథా ధేనుః చతుర్భిః స్తనైః స్తన్యం పయః క్షరతి వత్సాయ ఎవం వాగ్ధేనుః వక్ష్యమాణైః స్తనైః పయ ఇవ అన్నం క్షరతి దేవాదిభ్యః । కే పునః తే స్తనాః ? కే వా తే, యేభ్యః క్షరతి ? తస్యాః ఎతస్యా వాచో ధేన్వాః, ద్వౌ స్తనౌ దేవా ఉపజీవన్తి వత్సస్థానీయాః ; కౌ తౌ ? స్వాహాకారం చ వషట్కారం చ ; ఆభ్యాం హి హవిః దీయతే దేవేభ్యః । హన్తకారం మనుష్యాః ; హన్తేతి మనుష్యేభ్యః అన్నం ప్రయచ్ఛన్తి । స్వధాకారం పితరః ; స్వధాకారేణ హి పితృభ్యః స్వధాం ప్రయచ్ఛన్తి । తస్యా ధేన్వా వాచః ప్రాణః ఋషభః ; ప్రాణేన హి వాక్ప్రసూయతే ; మనో వత్సః ; మనసా హి ప్రస్రావ్యతే ; మనసా హ్యాలోచితే విషయే వాక్ ప్రవర్తతే ; తస్మాత్ మనః వత్సస్థానీయమ్ । ఎవం వాగ్ధేనూపాసకః తాద్భావ్యమేవ ప్రతిపద్యతే ॥