ಏತದ್ವೈ ಪರಮಂ ತಪಃ ; ಕಿಂ ತತ್ ? ಯತ್ ವ್ಯಾಹಿತಃ ವ್ಯಾಧಿತಃ ಜ್ವರಾದಿಪರಿಗೃಹೀತಃ ಸನ್ ಯತ್ ತಪ್ಯತೇ ತದೇತತ್ ಪರಮಂ ತಪ ಇತ್ಯೇವಂ ಚಿಂತಯೇತ್ , ದುಃಖಸಾಮಾನ್ಯಾತ್ । ತಸ್ಯ ಏವಂ ಚಿಂತಯತೋ ವಿದುಷಃ ಕರ್ಮಕ್ಷಯಹೇತುಃ ತದೇವ ತಪೋ ಭವತಿ ಅನಿಂದತಃ ಅವಿಷೀದತಃ । ಸ ಏವ ಚ ತೇನ ವಿಜ್ಞಾನತಪಸಾ ದಗ್ಧಕಿಲ್ಬಿಷಃ ಪರಮಂ ಹೈವ ಲೋಕಂ ಜಯತಿ, ಯ ಏವಂ ವೇದ । ತಥಾ ಮುಮೂರ್ಷುಃ ಆದಾವೇವ ಕಲ್ಪಯತಿ ; ಕಿಮ್ ? ಏತದ್ವೈ ಪರಮಂ ತಪಃ, ಯಂ ಪ್ರೇತಂ ಮಾಂ ಗ್ರಾಮಾದರಣ್ಯಂ ಹರಂತಿ ಋತ್ವಿಜಃ ಅಂತ್ಯಕರ್ಮಣೇ, ತತ್ ಗ್ರಾಮಾದರಣ್ಯಗಮನಸಾಮಾನ್ಯಾತ್ ಪರಮಂ ಮಮ ತತ್ ತಪೋ ಭವಿಷ್ಯತಿ ; ಗ್ರಾಮಾದರಣ್ಯಗಮನಂ ಪರಮಂ ತಪ ಇತಿ ಹಿ ಪ್ರಸಿದ್ಧಮ್ । ಪರಮಂ ಹೈವ ಲೋಕಂ ಜಯತಿ, ಯ ಏವಂ ವೇದ । ತಥಾ ಏತದ್ವೈ ಪರಮಂ ತಪಃ ಯಂ ಪ್ರೇತಮಗ್ನಾವಭ್ಯಾದಧತಿ, ಅಗ್ನಿಪ್ರವೇಶಸಾಮಾನ್ಯಾತ್ । ಪರಮಂ ಹೈವ ಲೋಕಂ ಜಯತಿ ಯ ಏವಂ ವೇದ ॥