अद्वैतशारदा | दक्षिणाम्नाय श्रीशारदापीठम्, शृङ्गेरी

ಋಚೋ ಯಜೂಂಷಿ ಸಾಮಾನೀತ್ಯಷ್ಟಾವಕ್ಷರಾಣ್ಯಷ್ಟಾಕ್ಷರಂ ಹ ವಾ ಏಕಂ ಗಾಯತ್ರ್ಯೈ ಪದಮೇತದು ಹೈವಾಸ್ಯಾ ಏತತ್ಸ ಯಾವತೀಯಂ ತ್ರಯೀ ವಿದ್ಯಾ ತಾವದ್ಧ ಜಯತಿ ಯೋಽಸ್ಯಾ ಏತದೇವಂ ಪದಂ ವೇದ ॥ ೨ ॥

ತಥಾ ಋಚಃ ಯಜೂಂಷಿ ಸಾಮಾನೀತಿ ತ್ರಯೀವಿದ್ಯಾನಾಮಾಕ್ಷರಾಣಿ ಏತಾನ್ಯಪಿ ಅಷ್ಟಾವೇವ ; ತಥೈವ ಅಷ್ಟಾಕ್ಷರಂ ಹ ವೈ ಏಕಂ ಗಾಯತ್ರ್ಯೈ ಪದಂ ದ್ವಿತೀಯಮ್ , ಏತತ್ ಉ ಹ ಏವ ಅಸ್ಯಾ ಏತತ್ ಋಗ್ಯಜುಃಸಾಮಲಕ್ಷಣಮ್ ಅಷ್ಟಾಕ್ಷರತ್ವಸಾಮಾನ್ಯಾದೇವ । ಸಃ ಯಾವತೀ ಇಯಂ ತ್ರಯೀ ವಿದ್ಯಾ ತ್ರಯ್ಯಾ ವಿದ್ಯಯಾ ಯಾವತ್ಫಲಜಾತಮ್ ಆಪ್ಯತೇ, ತಾವತ್ ಹ ಜಯತಿ, ಯೋಽಸ್ಯಾ ಏತತ್ ಗಾಯತ್ರ್ಯಾಃ ತ್ರೈವಿದ್ಯಲಕ್ಷಣಂ ಪದಂ ವೇದ ॥

ತಥೇತಿ ; ಋಚ ಇತಿ ; ಏತದಿತಿ ; ಸ ಯಾವತೀತಿ ॥೨॥ ;

ಪ್ರಥಮೇ ಪಾದೇ ತ್ರೈಲೋಕ್ಯದೃಷ್ಟಿವದ್ದ್ವಿತೀಯೇ ಪಾದೇ ಕರ್ತವ್ಯಾ ತ್ರೈವಿದ್ಯದೃಷ್ಟಿರಿತ್ಯಾಹ —

ತಥೇತಿ ।

ದೃಷ್ಟಿವಿಧ್ಯುಪಯೋಗಿತ್ವೇನ ಸಂಖ್ಯಾಸಾಮಾನ್ಯಂ ಕಥಯತಿ —

ಋಚ ಇತಿ ।

ಸಂಖ್ಯಾಸಾಮಾನ್ಯಫಲಮಾಹ —

ಏತದಿತಿ ।

ವಿದ್ಯಾಫಲಂ ದರ್ಶಯತಿ —

ಸ ಯಾವತೀತಿ ॥೨॥