ಮತಾಂತರಮುದ್ಭಾವಯತಿ —
ತಾಮೇತಾಮಿತಿ ।
’ತತ್ಸವಿತುರ್ವೃಣೀಮಹೇ ವಯಂ ದೇವಸ್ಯ ಭೋಜನಮ್ । ಶ್ರೇಷ್ಠಂ ಸರ್ವಧಾತಮಂ ತುರಂ ಭಾಗಸ್ಯ ಧೀಮಹಿ’ ಇತ್ಯನುಷ್ಟುಭಂ ಸಾವಿತ್ರೀಮಾಹುಃ । ಸವಿತೃದೇವತಾಕತ್ವಾದಿತ್ಯರ್ಥಃ । ಉಪನೀತಸ್ಯ ಮಾಣವಕಸ್ಯ ಪ್ರಥಮತಃ ಸರಸ್ವತ್ಯಾಂ ವರ್ಣಾತ್ಮಿಕಾಯಾಂ ಸಾಪೇಕ್ಷತ್ವಂ ದ್ಯೋತಯಿತುಂ ಹಿ ಶಬ್ದಃ ।
ದೂಷಯತಿ —
ನೇತ್ಯಾದಿನಾ ।
ನನ್ವಪೇಕ್ಷಿತವಾಗಾತ್ಮಕಸರಸ್ವತೀಸಮರ್ಪಣಂ ವಿನಾ ಗಾಯತ್ರೀಸಮರ್ಪಣಮುಕ್ತಮಿತಿ ಶಂಕಿತ್ವಾ ಪರಿಹರತಿ —
ಕಸ್ಮಾದಿತ್ಯಾದಿನಾ ।
ಯದಿ ಹೇತ್ಯಾದೇರುತ್ತರಸ್ಯ ಗ್ರಂಥಸ್ಯಾವ್ಯವಹಿತಪೂರ್ವಗ್ರಂಥಾಸಂಗತಿಮಾಶಂಕ್ಯಾಽಽಹ —
ಕಿಂಚೇದಮಿತಿ ।
ಸಾವಿತ್ರ್ಯಾ ಗಾಯತ್ರೀತ್ವಮಿತಿ ಯಾವತ್ ।
ಇವಶಬ್ದಾರ್ಥಂ ದರ್ಶಯತಿ —
ನ ಹೀತಿ ।
ಯದ್ಯಪಿ ಬಹು ಪ್ರತಿಗೃಹ್ಣಾತಿ ವಿದ್ವಾನಿತಿ ಪೂರ್ವೇಣ ಸಂಬಂಧಃ । ತಥಾಽಪಿ ನ ತೇನ ಪ್ರತಿಗ್ರಹಜಾತೇನೈಕಸ್ಯಾಪಿ ಗಾಯತ್ರೀಪದಸ್ಯ ವಿಜ್ಞಾನಫಲಂ ಭುಕ್ತಂ ಸ್ಯಾತ್ । ದೂರತಸ್ತು ದೋಷಾಧಾಯಕತ್ವಂ ತಸ್ಯೇತ್ಯರ್ಥಃ ॥೫॥