ಗಾಯತ್ರೀವಿದಃ ಪ್ರತಿಗೃಹ್ಣತೋ ದೋಷಾಭಾವಂ ಸಾಮಾನ್ಯೇನೋಕ್ತ್ವಾ ವಿಶೇಷಸ್ತದಭಾವಮಾಹ —
ಸ ಯ ಇತಿ ।
ಯಥಾ ತ್ರೈಲೋಕ್ಯಾವಚ್ಛಿನ್ನಸ್ಯ ತ್ರೈವಿದ್ಯಾವಚ್ಛಿನ್ನಸ್ಯ ಚಾರ್ಥಸ್ಯ ಪ್ರತಿಗ್ರಹೇಣ ಪಾದದ್ವಯವಿಜ್ಞಾನಫಲಮೇವ ಭುಕ್ತಂ ನಾಧಿಕಂ ದೂಷಣಂ ತಥೇತಿ ಯಾವತ್ ।
ಪ್ರತಿಗ್ರಹೀತಾ ದಾತಾ ವಾ ನೈವಂವಿಧಃ ಸಂಭಾವ್ಯತೇ ಕಿಂತು ಸ್ತುತ್ಯರ್ಥಂ ಶ್ರುತ್ಯೈತತ್ಕಲ್ಪಿತಮಿತ್ಯಾಹ —
ಕಲ್ಪಯಿತ್ವೇತಿ ।
ಉಕ್ತಮೇವ ಸಂಗೃಹ್ಣಾತಿ —
ಪಾದತ್ರಯೇತಿ ।
ಕಲ್ಪಯಿತ್ವೇದಮುಚ್ಯತ ಇತಿ ಕಿಮಿತಿ ಕಲ್ಪ್ಯತೇ ಮುಖ್ಯಮೇವೈತತ್ಕಿಂ ನ ಸ್ಯಾದಿತ್ಯಾಶಂಕ್ಯಾಽಽಹ —
ನ ಚೇತಿ ।
ಕಲ್ಪನಾಽಪಿ ತರ್ಹಿ ಕಿಮರ್ಥೇತ್ಯಾಶಂಕ್ಯಾಽಽಹ —
ಗಾಯತ್ರೀತಿ ।
ಅಂಗೀಕೃತ್ಯೋತ್ತರವಾಕ್ಯಮುತ್ಥಾಪಯತಿ —
ದಾತೇತಿ ।
ತದೇವಾಽಽಕಾಂಕ್ಷಾಪೂರ್ವಕಮಾಹ —
ಕಸ್ಮಾದಿತಿ ।
ವಾಗಾತ್ಮಕಪದತ್ರಯವಿಜ್ಞಾನಫಲಭೋಗೋಕ್ತ್ಯಾನಂತರ್ಯಮಥಶಬ್ದಾರ್ಥಃ । ನೈವ ಪ್ರಾಪ್ಯಂ ಪ್ರತಿಗ್ರಹೇಣ ಕೇನಚಿದಪಿ ನೈವ ಮುಕ್ತಂ ಸ್ಯಾದಿತ್ಯರ್ಥಃ ।
ತತ್ರೈವ ವೈಧರ್ಮ್ಯದೃಷ್ಟಾಂತಮಾಹ —
ಯಥೇತಿ ।
ತಾನಿ ಪ್ರತಿಗ್ರಹೇಣ ಯಥಾಽಽಪ್ಯಾನಿ ನ ತಥೈತದಾಪ್ಯಮಿತ್ಯರ್ಥಃ ।
ಕುತ ಇತ್ಯಾದಿವಾಕ್ಯಸ್ಯ ತಾತ್ಪರ್ಯಮಾಹ —
ಏತಾನ್ಯಪೀತಿ ।
ಗಾಯತ್ರೀವಿದಃ ಸ್ತುತಿರುಕ್ತಾ ತತ್ಫಲಮಾಹ —
ತಸ್ಮಾದಿತಿ ।
ಏವಂಪ್ರಕಾರಾ ಪಾದಚತುಷ್ಟಯರೂಪಾ ಸರ್ವಾತ್ಮಿಕೇತ್ಯರ್ಥಃ ॥೬॥