ప్రకృతముపాసనమేవ మన్త్రేణ సంగృహ్ణాతి —
తస్యా ఇత్యాదినా ।
ధ్యేయం రూపముక్త్వా జ్ఞేయం గాయత్ర్యా రూపముపన్యస్యతి —
అతఃపరమితి ।
చతుర్థస్య పాదస్య పాదత్రయాపేక్షయా ప్రాధాన్యమభిప్రేత్యాఽఽహ —
అత ఇతి ।
యథోక్తనమస్కారస్య ప్రయోజనమాహ —
అసావితి ।
ద్వివిధముపస్థానమాభిచారికమాభ్యుదయికం చ తత్రాఽఽద్యం ద్వేధా వ్యుత్పాదయతి —
యం ద్విష్యాదితి ।
నామగృహ్ణీయాత్తదీయం నామ గృహీత్వా చ తదభిప్రేతం మా ప్రాపదిత్యనేనోపాస్థానమితి సంబన్ధః ।
ఆభ్యుదయికముపస్థానం దర్శయతి —
అహమితి ।
కీదృగుపస్థానమత్ర మన్త్రపదేన కర్తవ్యమిత్యాశఙ్క్య యథారుచి వికల్పం దర్శయతి —
అసావితి ॥౭॥