ఎతద్ధ వై తజ్జనకో వైదేహో బుడిలమాశ్వతరాశ్విమువాచ యన్ను హో తద్గాయత్రీవిదబ్రూథా అథ కథం హస్తీభూతో వహసీతి ముఖం హ్యస్యాః సమ్రాణ్న విదాఞ్చకారేతి హోవాచ తస్యా అగ్నిరేవ ముఖం యది హ వా అపి బహ్వివాగ్నావభ్యాదధతి సర్వమేవ తత్సన్దహత్యేవం హైవైవంవిద్యద్యపి బహ్వివ పాపం కురుతే సర్వమేవ తత్సమ్ప్సాయ శుద్ధః పూతోఽజరోఽమృతః సమ్భవతి ॥ ౮ ॥
గాయత్ర్యా ముఖవిధానాయ అర్థవాద ఉచ్యతే — ఎతత్ హ కిల వై స్మర్యతే, తత్ తత్ర గాయత్రీవిజ్ఞానవిషయే ; జనకో వైదేహః, బుడిలో నామతః, అశ్వతరాశ్వస్యాపత్యమ్ ఆశ్వతరాశ్విః, తం కిల ఉక్తవాన్ ; యత్ ను ఇతి వితర్కే, హో అహో ఇత్యేతత్ , తత్ యత్ త్వం గాయత్రీవిదబ్రూథాః, గాయత్రీవిదస్మీతి యదబ్రూథాః, కిమిదం తస్య వచసోఽననురూపమ్ ; అథ కథమ్ , యది గాయత్రీవిత్ , ప్రతిగ్రహదోషేణ హస్తీభూతో వహసీతి । స ప్రత్యాహ రాజ్ఞా స్మారితః — ముఖం గాయత్ర్యాః హి యస్మాత్ అస్యాః, హే సమ్రాట్ , న విదాఞ్చకార న విజ్ఞాతవానస్మి — ఇతి హోవాచ ; ఎకాఙ్గవికలత్వాత్ గాయత్రీవిజ్ఞానం మమ అఫలం జాతమ్ ।