ಉಕ್ತಾ ವಸಿಷ್ಠತ್ವಾದಿಗುಣಾ ನ ವಾಗಾದಿಗಾಮಿನಃ ಕಿಂತು ಮುಖ್ಯಪ್ರಾಣಗತಾ ಏವೇತಿ ದರ್ಶಯಿತುಮಾಖ್ಯಾಯಿಕಾಂ ಕರೋತಿ —
ತೇ ಹೇತ್ಯಾದಿನಾ ।
ಈಯಸುನ್ಪ್ರಯೋಗಸ್ಯ ತಾತ್ಪರ್ಯಮಾಹ —
ಶರೀರಂ ಹೀತಿ ।
ಕಿಮಿತಿ ಶರೀರಸ್ಯ ಪಾಪೀಯಸ್ತ್ವಮುಚ್ಯತೇ ತದಾಹ —
ವೈರಾಗ್ಯಾರ್ಥಮಿತಿ ।
ಶರೀರೇ ವೈರಾಗ್ಯೋತ್ಪಾದನದ್ವಾರಾ ತಸ್ಮಿನ್ನಹಂಮಮಾಭಿಮಾನಪರಿಹಾರಾರ್ಥಮಿತ್ಯರ್ಥಃ । ವಸಿಷ್ಠೋ ಭವತೀತ್ಯುಕ್ತವಾನಿತಿ ಸಂಬಂಧಃ ।
ಕಿಮಿತಿ ಸಾಕ್ಷಾದೇವ ಮುಖ್ಯಂ ಪ್ರಾಣಂ ವಸಿಷ್ಠತ್ವಾದಿಗುಣಂ ನೋಕ್ತವಾನ್ಪ್ರಜಾಪತಿಃ ಸ ಹಿ ಸರ್ವಜ್ಞ ಇತ್ಯಾಶಂಕ್ಯಾಹ —
ಜಾನನ್ನಪೀತಿ ॥೭॥