ತೇ ಏವಮುಕ್ತಾ ಬ್ರಹ್ಮಣಾ ಪ್ರಾಣಾಃ ಆತ್ಮನೋ ವೀರ್ಯಪರೀಕ್ಷಣಾಯ ಕ್ರಮೇಣ ಉಚ್ಚಕ್ರಮುಃ । ತತ್ರ ವಾಗೇವ ಪ್ರಥಮಂ ಹ ಅಸ್ಮಾತ್ ಶರೀರಾತ್ ಉಚ್ಚಕ್ರಾಮ ಉತ್ಕ್ರಾಂತವತೀ ; ಸಾ ಚೋತ್ಕ್ರಮ್ಯ, ಸಂವತ್ಸರಂ ಪ್ರೋಷ್ಯ ಪ್ರೋಷಿತಾ ಭೂತ್ವಾ, ಪುನರಾಗತ್ಯೋವಾಚ — ಕಥಮ್ ಅಶಕತ ಶಕ್ತವಂತಃ ಯೂಯಮ್ , ಮದೃತೇ ಮಾಂ ವಿನಾ, ಜೀವಿತುಮಿತಿ । ತೇ ಏವಮುಕ್ತಾಃ ಊಚುಃ — ಯಥಾ ಲೋಕೇ ಅಕಲಾಃ ಮೂಕಾಃ, ಅವದಂತಃ ವಾಚಾ, ಪ್ರಾಣಂತಃ ಪ್ರಾಣನವ್ಯಾಪಾರಂ ಕುರ್ವಂತಃ ಪ್ರಾಣೇನ, ಪಶ್ಯಂತಃ ದರ್ಶನವ್ಯಾಪಾರಂ ಚಕ್ಷುಷಾ ಕುರ್ವಂತಃ, ತಥಾ ಶೃಣ್ವಂತಃ ಶ್ರೋತ್ರೇಣ, ವಿದ್ವಾಂಸಃ ಮನಸಾ ಕಾರ್ಯಾಕಾರ್ಯಾದಿವಿಷಯಮ್ , ಪ್ರಜಾಯಮಾನಾಃ ರೇತಸಾ ಪುತ್ರಾನ್ ಉತ್ಪಾದಯಂತಃ, ಏವಮಜೀವಿಷ್ಮ ವಯಮ್ — ಇತ್ಯೇವಂ ಪ್ರಾಣೈಃ ದತ್ತೋತ್ತರಾ ವಾಕ್ ಆತ್ಮನಃ ಅಸ್ಮಿನ್ ಅವಸಿಷ್ಠತ್ವಂ ಬುದ್ಧ್ವಾ, ಪ್ರವಿವೇಶ ಹ ವಾಕ್ ॥