ಅಥ ಹ ಪ್ರಾಣ ಉತ್ಕ್ರಮಿಷ್ಯನ್ ಉತ್ಕ್ರಮಣಂ ಕರಿಷ್ಯನ್ ; ತದಾನೀಮೇವ ಸ್ವಸ್ಥಾನಾತ್ಪ್ರಚಲಿತಾ ವಾಗಾದಯಃ । ಕಿಮಿವೇತ್ಯಾಹ — ಯಥಾ ಲೋಕೇ, ಮಹಾಂಶ್ಚಾಸೌ ಸುಹಯಶ್ಚ ಮಹಾಸುಹಯಃ, ಶೋಭನೋ ಹಯಃ ಲಕ್ಷಣೋಪೇತಃ, ಮಹಾನ್ ಪರಿಮಾಣತಃ, ಸಿಂಧುದೇಶೇ ಭವಃ ಸೈಂಧವಃ ಅಭಿಜನತಃ, ಪಡ್ವೀಶಶಂಕೂನ್ ಪಾದಬಂಧನಶಂಕೂನ್ , ಪಡ್ವೀಶಾಶ್ಚ ತೇ ಶಂಕವಶ್ಚ ತಾನ್ , ಸಂವೃಹೇತ್ ಉದ್ಯಚ್ಛೇತ್ ಯುಗಪದುತ್ಖನೇತ್ ಅಶ್ವಾರೋಹೇ ಆರೂಢೇ ಪರೀಕ್ಷಣಾಯ ; ಏವಂ ಹ ಏವ ಇಮಾನ್ ವಾಗಾದೀನ್ ಪ್ರಾಣಾನ್ ಸಂವವರ್ಹ ಉದ್ಯತವಾನ್ ಸ್ವಸ್ಥಾನಾತ್ ಭ್ರಂಶಿತವಾನ್ । ತೇ ವಾಗಾದಯಃ ಹ ಊಚುಃ — ಹೇ ಭಗವಃ ಭಗವನ್ ಮಾ ಉತ್ಕ್ರಮೀಃ ; ಯಸ್ಮಾತ್ ನ ವೈ ಶಕ್ಷ್ಯಾಮಃ ತ್ವದೃತೇ ತ್ವಾಂ ವಿನಾ ಜೀವಿತುಮಿತಿ । ಯದ್ಯೇವಂ ಮಮ ಶ್ರೇಷ್ಠತಾ ವಿಜ್ಞಾತಾ ಭವದ್ಭಿಃ, ಅಹಮತ್ರ ಶ್ರೇಷ್ಠಃ, ತಸ್ಯ ಉ ಮೇ ಮಮ ಬಲಿಂ ಕರಂ ಕುರುತ ಕರಂ ಪ್ರಯಚ್ಛತೇತಿ । ಅಯಂ ಚ ಪ್ರಾಣಸಂವಾದಃ ಕಲ್ಪಿತಃ ವಿದುಷಃ ಶ್ರೇಷ್ಠಪರೀಕ್ಷಣಪ್ರಕಾರೋಪದೇಶಃ ; ಅನೇನ ಹಿ ಪ್ರಕಾರೇಣ ವಿದ್ವಾನ್ ಕೋ ನು ಖಲು ಅತ್ರ ಶ್ರೇಷ್ಠ ಇತಿ ಪರೀಕ್ಷಣಂ ಕರೋತಿ ; ಸ ಏಷ ಪರೀಕ್ಷಣಪ್ರಕಾರಃ ಸಂವಾದಭೂತಃ ಕಥ್ಯತೇ ; ನ ಹಿ ಅನ್ಯಥಾ ಸಂಹತ್ಯಕಾರಿಣಾಂ ಸತಾಮ್ ಏಷಾಮ್ ಅಂಜಸೈವ ಸಂವತ್ಸರಮಾತ್ರಮೇವ ಏಕೈಕಸ್ಯ ನಿರ್ಗಮನಾದಿ ಉಪಪದ್ಯತೇ ; ತಸ್ಮಾತ್ ವಿದ್ವಾನೇವ ಅನೇನ ಪ್ರಕಾರೇಣ ವಿಚಾರಯತಿ ವಾಗಾದೀನಾಂ ಪ್ರಧಾನಬುಭುತ್ಸುಃ ಉಪಾಸನಾಯ ; ಬಲಿಂ ಪ್ರಾರ್ಥಿತಾಃ ಸಂತಃ ಪ್ರಾಣಾಃ, ತಥೇತಿ ಪ್ರತಿಜ್ಞಾತವಂತಃ ॥