సా హ వాక్ ప్రథమం బలిదానాయ ప్రవృత్తా హ కిల ఉవాచ ఉక్తవతీ — యత్ వై అహం వసిష్ఠాస్మి, యత్ మమ వసిష్ఠత్వమ్ , తత్ తవైవ ; తేన వసిష్ఠగుణేన త్వం తద్వసిష్ఠోఽసీతి । యత్ వై అహం ప్రతిష్ఠాస్మి, త్వం తత్ప్రతిష్ఠోఽసి, యా మమ ప్రతిష్ఠా సా త్వమసీతి చక్షుః । సమానమ్ అన్యత్ । సమ్పదాయతనప్రజాతిత్వగుణాన్ క్రమేణ సమర్పితవన్తః । యద్యేవమ్ , సాధు బలిం దత్తవన్తో భవన్తః ; బ్రూత — తస్య ఉ మే ఎవంగుణవిశిష్టస్య కిమన్నమ్ , కిం వాస ఇతి ; ఆహురితరే — యదిదం లోకే కిఞ్చ కిఞ్చిత్ అన్నం నామ ఆ శ్వభ్యః ఆ కృమిభ్యః ఆ కీటపతఙ్గేభ్యః, యచ్చ శ్వాన్నం కృమ్యన్నం కీటపతఙ్గాన్నం చ, తేన సహ సర్వమేవ యత్కిఞ్చిత్ ప్రాణిభిరద్యమానమ్ అన్నమ్ , తత్సర్వం తవాన్నమ్ । సర్వం ప్రాణస్యాన్నమితి దృష్టిః అత్ర విధీయతే ॥