ಶ್ವೇತಕೇತುಃ ನಾಮತಃ, ಅರುಣಸ್ಯಾಪತ್ಯಮ್ ಆರುಣಿಃ, ತಸ್ಯಾಪತ್ಯಮ್ ಆರುಣೇಯಃ ; ಹ - ಶಬ್ದಃ ಐತಿಹ್ಯಾರ್ಥಃ ; ವೈ ನಿಶ್ಚಯಾರ್ಥಃ ; ಪಿತ್ರಾ ಅನುಶಿಷ್ಟಃ ಸನ್ ಆತ್ಮನೋ ಯಶಃಪ್ರಥನಾಯ ಪಂಚಾಲಾನಾಂ ಪರಿಷದಮಾಜಗಾಮ ; ಪಂಚಾಲಾಃ ಪ್ರಸಿದ್ಧಾಃ ; ತೇಷಾಂ ಪರಿಷದಮಾಗತ್ಯ, ಜಿತ್ವಾ, ರಾಜ್ಞೋಽಪಿ ಪರಿಷದಂ ಜೇಷ್ಯಾಮೀತಿ ಗರ್ವೇಣ ಸ ಆಜಗಾಮ ; ಜೀವಲಸ್ಯಾಪತ್ಯಂ ಜೈವಲಿಂ ಪಂಚಾಲರಾಜಂ ಪ್ರವಾಹಣನಾಮಾನಂ ಸ್ವಭೃತ್ಯೈಃ ಪರಿಚಾರಯಮಾಣಮ್ ಆತ್ಮನಃ ಪರಿಚರಣಂ ಕಾರಯಂತಮಿತ್ಯೇತತ್ ; ಸ ರಾಜಾ ಪೂರ್ವಮೇವ ತಸ್ಯ ವಿದ್ಯಾಭಿಮಾನಗರ್ವಂ ಶ್ರುತ್ವಾ, ವಿನೇತವ್ಯೋಽಯಮಿತಿ ಮತ್ವಾ, ತಮುದೀಕ್ಷ್ಯ ಉತ್ಪ್ರೇಕ್ಷ್ಯ ಆಗತಮಾತ್ರಮೇವ ಅಭ್ಯುವಾದ ಅಭ್ಯುಕ್ತವಾನ್ , ಕುಮಾರಾ೩ ಇತಿ ಸಂಬೋಧ್ಯ ; ಭರ್ತ್ಸನಾರ್ಥಾ ಪ್ಲುತಿಃ । ಏವಮುಕ್ತಃ ಸಃ ಪ್ರತಿಶುಶ್ರಾವ — ಭೋ೩ ಇತಿ । ಭೋ೩ ಇತಿ ಅಪ್ರತಿರೂಪಮಪಿ ಕ್ಷತ್ತ್ರಿಯಂ ಪ್ರತಿ ಉಕ್ತವಾನ್ ಕ್ರುದ್ಧಃ ಸನ್ । ಅನುಶಿಷ್ಟಃ ಅನುಶಾಸಿತೋಽಸಿ ಭವಸಿ ಕಿಂ ಪಿತ್ರಾ — ಇತ್ಯುವಾಚ ರಾಜಾ । ಪ್ರತ್ಯಾಹ ಇತರಃ — ಓಮಿತಿ, ಬಾಢಮನುಶಿಷ್ಟೋಽಸ್ಮಿ, ಪೃಚ್ಛ ಯದಿ ಸಂಶಯಸ್ತೇ ॥