ಏತಲ್ಲೋಕಪೃಥಿವ್ಯೋರ್ದೇಹದೇಹಿಭಾವೇನ ಭೇದ ಇತ್ಯಾಹ —
ಪೃಥಿವೀಚ್ಛಾಯಾಂ ಹೀತಿ ।
‘ಏತಾನಿ ಹಿ ಚಂದ್ರಂ ರಾತ್ರೇಸ್ತಮಸೋ ಮೃತ್ಯೋರ್ಬಿಭ್ಯತಮತ್ಯಪಾರಯನ್’ ಇತಿ ಶ್ರುತೇರಾತ್ರೇಸ್ತಮತ್ವಾವಗಮಾತ್ತಸ್ಯ ಚ ಮೃತ್ಯುರ್ವೈ ತಮಶ್ಛಾಯಾ ಮೃತ್ಯುಮೇವ ತತ್ತಮಶ್ಛಾಯಾಂ ತರತೀತಿ ಭೂಛಾಯಾತ್ವಂ ಶ್ರುತಮ್ । ತಮೋ ರಾಹುಸ್ಥಾನಂ ತಚ್ಚ ಭೂಚ್ಛಾಯೇತಿ ಹಿ ಪ್ರಸಿದ್ಧಮ್ –
“ಉಧೃತ್ಯ ಪೃಥಿವೀಚ್ಛಾಯಾಂ ನಿರ್ಮಿತಂ ಮಂಡಲಾಕೃತಿ । ಸ್ವರ್ಭಾನೋಸ್ತು ಬೃಹತ್ಸ್ಥಾನಂ ತೃತೀಯಂ ಯತ್ತಮೋಮಯಮ್ ॥“
ಇತಿ ಸ್ಮೃತೇರಿತ್ಯರ್ಥಃ । ಸೋಮಚಂದ್ರಮಸೋರಾಶ್ರಯಾಶ್ರಯಿಭಾವೇನ ಭೇದಃ ॥೧೧॥