ದೇವಯಾನಂ ಪಂಥಾನಮುಕ್ತ್ವಾ ಪಥ್ಯಂತರಂ ವಕ್ತುಂ ವಾಕ್ಯಾಂತರಮಾದಾಯ ಪದದ್ವಯಂ ವ್ಯಾಕರೋತಿ —
ಅಥೇತ್ಯಾದಿನಾ ।
ಕಥಂ ತೇ ಫಲಭಾಗಿನೋ ಭವಂತೀತ್ಯಾಶಂಕ್ಯಾಽಽಹ —
ಯಜ್ಞೇನೇತಿ ।
ನನು ದಾನತಪಸೀ ಯಜ್ಞಗ್ರಹಣೇನೈವ ಗೃಹೀತೇ ನ ಪೃಥಗ್ಗ್ರಹೀತವ್ಯೇ ತತ್ರಾಽಽಹ —
ಬಹಿರ್ವೇದೀತಿ ।
ದೀಕ್ಷಾದೀತ್ಯಾದಿಪದೇನ ಪಯೋವ್ರತಾದಿಯಜ್ಞಾಂಗಸಂಗ್ರಹಃ । ತತ್ರೇತಿ ಪಿತೃಲೋಕೋಕ್ತಿಃ ಅಪಿಶಬ್ದೋ ಬ್ರಹ್ಮಲೋಕದೃಷ್ಟಾಂತಾರ್ಥಃ ।
ಧೂಮಸಂಪತ್ತೇರಪುರುಷಾರ್ಥತ್ವಮಾಶಂಕ್ಯೋಕ್ತಮ್ —
ಉತ್ತರಮಾರ್ಗ ಇವೇತಿ ।
ಇಹಾಪೀತಿ ಪಿತೃಯಾಣಮಾರ್ಗೇಽಪೀತ್ಯರ್ಥಃ । ತದ್ವದೇವೇತ್ಯುತ್ತರಮಾರ್ಗಗಾಮಿನೀನಾಂ ದೇವತಾನಾಮಿವೇತ್ಯರ್ಥಃ । ತತ್ರೇತಿ ಪ್ರಕೃತಲೋಕೋಕ್ತಿಃ ।
ಕರ್ಮಿಣಾಂ ತರ್ಹಿ ದೇವೈರ್ಭಕ್ಷ್ಯಮಾಣಾನಾಂ ಚಂದ್ರಲೋಕಪ್ರಾಪ್ತಿರನರ್ಥಾಯೈವೇತ್ಯಾಶಂಕ್ಯಾಽಽಹ —
ಉಪಭುಂಜತ ಇತಿ ।
ಅನ್ಯಥಾಪ್ರತಿಭಾಸಂ ವ್ಯಾವರ್ತಯತಿ —
ಆಪ್ಯಾಯಸ್ವೇತಿ ।
ಏವಂ ದೇವಾ ಅಪೀತಿ ಸಂಕ್ಷಿಪ್ತಂ ದಾರ್ಷ್ಟಾಂತಿಕಂ ವಿವೃಣೋತಿ —
ಸೋಮಲೋಕ ಇತಿ ।
ಕಥಂ ಪೌನಃಪುನ್ಯೇನ ವಿಶ್ರಾಂತಿಃ ಸಂಪಾದ್ಯತೇ ತತ್ರಾಽಽಹ —
ಕರ್ಮಾನುರೂಪಮಿತಿ ।
ದೃಷ್ಟಾಂತವದ್ದಾರ್ಷ್ಟಾಂತಿಕೇ ಕಿಮಿತ್ಯಾಪ್ಯಾಯನಂ ನೋಕ್ತಂ ತತ್ರಾಽಽಹ —
ತದ್ಧೀತಿ ।
ಪುನಃ ಪುನರ್ವಿಶ್ರಾಮಾಭ್ಯನುಜ್ಞಾನಮಿತಿ ಯಾವತ್ ।
ಲೋಕದ್ವಯಪ್ರಾಪಕೌ ಪಂಥಾನಾವಿತ್ಥಂ ವ್ಯಾಖ್ಯಾಯ ಪುನರೇತಲ್ಲೋಕಪ್ರಾಪ್ತಿಪ್ರಕಾರಮಾಹ —
ತೇಷಾಮಿತ್ಯಾದಿನಾ ।
ಕಥಂ ಚಂದ್ರಸ್ಥಲಸ್ಖಲಿತಾನಾಂ ಕರ್ಮಿಣಾಮಾಕಾಶತಾದಾತ್ಮ್ಯಮಿತ್ಯಾಶಂಕ್ಯಾಽಽಹ —
ಯಾಸ್ತಾ ಇತಿ ।
ಸೋಮಾಕಾರಪರಿಣತತ್ವಮೇವ ಸ್ಫೋರಯತಿ —
ಯಾಭಿರಿತಿ ।
ತಸ್ಯ ಝಟಿತಿ ದ್ರವೀಭವನಯೋಗ್ಯತಾಂ ದರ್ಶಯತಿ —
ಅಮ್ಮಯಮಿತಿ ।
ಸಾಭಾವ್ಯಾಪತ್ತಿರುಪಪತ್ತೇರಿತಿ ನ್ಯಾಯೇನಾಽಽಹ —
ಆಕಾಶಭೂತಾ ಇತಿ ।
ಆಕಾಶಾದ್ವಾಯುಪ್ರಾಪ್ತಿಪ್ರಕಾರಮಾಹ —
ತೇ ಪುನರಿತಿ ।
ಅನ್ಯಾಧಿಷ್ಠಿತೇ ಪೂರ್ವವದಭಿಲಾಪಾದಿತಿ ನ್ಯಾಯೇನಾಽಽಹ —
ತೇ ಪೃಥಿವೀಮಿತಿ ।
ರೇತಃಸಿಗ್ಯೋಗೋಽಥೇತಿ ನ್ಯಾಯಮಾಶ್ರಿತ್ಯಾಽಽಹ —
ತೇ ಪುನರಿತಿ ।
ಯೋನೇಃ ಶರೀರಮಿತಿ ನ್ಯಾಯಮನುಸೃತ್ಯಾಽಽಹ —
ತತ ಇತಿ ।
ಉತ್ಪನ್ನಾನಾಂ ಕೇಷಾಂಚಿದಿಷ್ಟಾದಿಕಾರಿತ್ವಮಾಹ —
ಲೋಕಮಿತಿ ।
ಕರ್ಮಾನುಷ್ಠಾನಾನಂತರಂ ತತ್ಫಲಭಾಗಿತ್ವಮಾಹ —
ತತೋ ಧೂಮಾದಿನೇತಿ ।
ಸೋಮಲೋಕೇ ಫಲಭೋಗಾನಂತರಂ ಪುನರೇತಲ್ಲೋಕಪ್ರಾಪ್ತಿಮಾಹ —
ಪುನರಿತಿ ।
ಪೌನಃಪುನ್ಯೇನ ವಿಪರಿವರ್ತನಸ್ಯಾವಧಿಂ ಸೂಚಯತಿ —
ಉತ್ತರಮಾರ್ಗಾಯೇತಿ ।
ಪ್ರಾಗ್ಜ್ಞಾನಾತ್ಸಂಸರಣಂ ಷಷ್ಠೇಽಪಿ ವ್ಯಾಖ್ಯಾತಮಿತ್ಯಾಹ —
ಇತಿ ನ್ವಿತಿ ।
ಸ್ಥಾನದ್ವಯಮಾವೃತ್ತಿಸಹಿತಮುಕ್ತ್ವಾ ಸ್ಥಾನಾಂತರಂ ದರ್ಶಯತಿ —
ಅಥೇತ್ಯಾದಿನಾ ।
ಸ್ಥಾನದ್ವಯಾತ್ತೃತೀಯೇ ಸ್ಥಾನೇ ವಿಶೇಷಂ ಕಥಯತಿ —
ಏವಮಿತಿ ।
ತೃತೀಯೇ ಸ್ಥಾನೇ ಛಾಂದೋಗ್ಯಶ್ರುತಿಂ ಸಂವಾದಯತಿ —
ತಥಾ ಚೇತಿ ।
ಅಮುಷ್ಯಾ ಗತೇರತಿಕಷ್ಟತ್ವೇ ಪರಿಶಿಷ್ಟಂ ವಾಕ್ಯಾರ್ಥಮಾಚಷ್ಟೇ —
ತಸ್ಮಾದಿತಿ ।
ಸರ್ವೋತ್ಸಾಹೋ ವಾಕ್ಯಕಾಯಚೇತಸಾಂ ಪ್ರಯತ್ನಃ ।
ಯದುಕ್ತಮಸ್ಯಾಂ ನಿಮಗ್ನಸ್ಯ ಪುನರುದ್ಧಾರೋ ದುರ್ಲಭೋ ಭವತೀತಿ ತತ್ರ ಶ್ರುತ್ಯಂತರಮನುಕೂಲಯತಿ —
ತಥಾ ಚೇತಿ ।
ಅತೋ ವ್ರೀಹ್ಯಾದಿಭಾವಾದಿತ್ಯರ್ಥಃ । ತಸ್ಮಾದಿತ್ಯತಿಕಷ್ಟಾತ್ಸಂಸಾರಾದಿತ್ಯರ್ಥಃ ।
ದಕ್ಷಿಣೋತ್ತರಮಾರ್ಗಪ್ರಾಪ್ತಿಸಾಧನೇ ಯತ್ನಸಾಮ್ಯಮಾಶಂಕ್ಯಾಽಽಹ —
ಅತ್ರಾಪೀತಿ ।
ಪಂಚ ಪ್ರಶ್ನಾನ್ಪ್ರಸ್ತುತ್ಯ ಕಿಮಿತಿ ಪ್ರತ್ಯೇಕಂ ತೇಷಾಂ ನಿರ್ಣಯೋ ನ ಕೃತ ಇತ್ಯಾಶಂಕ್ಯಾಽಽಹ —
ಏವಮಿತಿ ।
ನಿರ್ಣೀತಂ ಪ್ರಕಾರಮೇವ ಸಂಗೃಹ್ಣಾತಿ —
ಅಸಾವಿತ್ಯಾದಿನಾ ।
ಪ್ರಾಥಮ್ಯೇನ ನಿರ್ಣೀತ ಇತಿ ಸಂಬಂಧಃ । ದೇವಯಾನಸ್ಯೇತ್ಯಾದಿಃ ಪಂಚಮಃ ಪ್ರಶ್ನಃ । ಸ ತು ದ್ವಿತೀಯತ್ವೇನ ದಕ್ಷಿಣಾದಿಮಾರ್ಗಾಪತ್ತಿಸಾಧನೋಕ್ತ್ಯಾ ನಿರ್ಣೀತ ಇತ್ಯರ್ಥಃ । ತೇನೈವ ಮಾರ್ಗದ್ವಯಪ್ರಾಪ್ತಿಸಾಧನೋಪದೇಶೇನೈವೇತಿ ಯಾವತ್ ।
ಮೃತಾನಾಂ ಪ್ರಜಾನಾಂ ವಿಪ್ರತಿಪತ್ತಿಃ ಪ್ರಥಮಪ್ರಶ್ನಸ್ತಸ್ಯ ನಿರ್ಣಯಪ್ರಕಾರಮಾಹ —
ಅಗ್ನೇರಿತಿ ।
ದ್ವಿತೀಯಪ್ರಶ್ನಸ್ವರೂಪಮನೂದ್ಯ ತಸ್ಯ ನಿರ್ಣೀತತ್ವಪ್ರಕಾರಂ ಪ್ರಕಟಯತಿ —
ಪುನರಾವೃತ್ತಿಶ್ಚೇತಿ ।
ಆಗಚ್ಛಂತೀತಿ ನಿರ್ಣೀತ ಇತ್ಯುತ್ತರತ್ರ ಸಂಬಂಧಃ । ತೇನೈವ ಪುನರಾವೃತ್ತೇಃ ಸತ್ತ್ವೇನೇತ್ಯರ್ಥಃ । ಅಮುಷ್ಯ ಲೋಕಸ್ಯಾಸಂಪೂರ್ತಿರ್ಹಿ ತೃತೀಯಃ ಪ್ರಶ್ನಃ। ಸ ಚ ದ್ವಾಭ್ಯಾಂ ಹೇತುಭ್ಯಾಂ ಪ್ರಾಗುಕ್ತಾಭ್ಯಾಂ ನಿರ್ಧಾರಿತೋ ಭವತೀತಿ ಭಾವಃ ॥೧೬॥