अद्वैतशारदा | दक्षिणाम्नाय श्रीशारदापीठम्, शृङ्गेरी

ಅಥಾಭಿಪ್ರಾತರೇವ ಸ್ಥಾಲೀಪಾಕಾವೃತಾಜ್ಯಂ ಚೇಷ್ಟಿತ್ವಾ ಸ್ಥಾಲೀಪಾಕಸ್ಯೋಪಘಾತಂ ಜುಹೋತ್ಯಗ್ನಯೇ ಸ್ವಾಹಾನುಮತಯೇ ಸ್ವಾಹಾ ದೇವಾಯ ಸವಿತ್ರೇ ಸತ್ಯಪ್ರಸವಾಯ ಸ್ವಾಹೇತಿ ಹುತ್ವೋದ್ಧೃತ್ಯ ಪ್ರಾಶ್ನಾತಿ ಪ್ರಾಶ್ಯೇತರಸ್ಯಾಃ ಪ್ರಯಚ್ಛತಿ ಪ್ರಕ್ಷಾಲ್ಯ ಪಾಣೀ ಉದಪಾತ್ರಂ ಪೂರಯಿತ್ವಾ ತೇನೈನಾಂ ತ್ರಿರಭ್ಯುಕ್ಷತ್ಯುತ್ತಿಷ್ಠಾತೋ ವಿಶ್ವಾವಸೋಽನ್ಯಾಮಿಚ್ಛ ಪ್ರಪೂರ್ವ್ಯಾಂ ಸಂ ಜಾಯಾಂ ಪತ್ಯಾ ಸಹೇತಿ ॥ ೧೯ ॥

ಅಥಾಭಿಪ್ರಾತರೇವ ಕಾಲೇ ಅವಘಾತನಿರ್ವೃತ್ತಾನ್ ತಂಡುಲಾನಾದಾಯ ಸ್ಥಾಲೀಪಾಕಾವೃತಾ ಸ್ಥಾಲೀಪಾಕವಿಧಿನಾ, ಆಜ್ಯಂ ಚೇಷ್ಟಿತ್ವಾ, ಆಜ್ಯಸಂಸ್ಕಾರಂ ಕೃತ್ವಾ, ಚರುಂ ಶ್ರಪಯಿತ್ವಾ, ಸ್ಥಾಲೀಪಾಕಸ್ಯ ಆಹುತೀಃ ಜುಹೋತಿ, ಉಪಘಾತಮ್ ಉಪಹತ್ಯೋಪಹತ್ಯ ‘ಅಗ್ನಯೇ ಸ್ವಾಹಾ’ ಇತ್ಯಾದ್ಯಾಃ । ಗಾರ್ಹ್ಯಃ ಸರ್ವೋ ವಿಧಿಃ ದ್ರಷ್ಟವ್ಯಃ ಅತ್ರ ; ಹುತ್ವಾ ಉದ್ಧೃತ್ಯ ಚರುಶೇಷಂ ಪ್ರಾಶ್ನಾತಿ ; ಸ್ವಯಂ ಪ್ರಾಶ್ಯ ಇತರಸ್ಯಾಃ ಪತ್ನ್ಯೈ ಪ್ರಯಚ್ಛತಿ ಉಚ್ಛಿಷ್ಟಮ್ । ಪ್ರಕ್ಷಾಲ್ಯ ಪಾಣೀ ಆಚಮ್ಯ ಉದಪಾತ್ರಂ ಪೂರಯಿತ್ವಾ ತೇನೋದಕೇನ ಏನಾಂ ತ್ರಿರಭ್ಯುಕ್ಷತಿ ಅನೇನ ಮಂತ್ರೇಣ ‘ಉತ್ತಿಷ್ಠಾತಃ’ ಇತಿ, ಸಕೃನ್ಮಂತ್ರೋಚ್ಚಾರಣಮ್ ॥

ಅಥೇತಿ ; ಗಾರ್ಹ್ಯ ಇತಿ ;

ಕದಾ ಪುನರಿದಮೋದನಪಾಕಾದಿ ಕರ್ತವ್ಯಂ ತದಾಹ —

ಅಥೇತಿ ।

ಕೋಽಸೌ ಸ್ಥಾಲೀಪಾಕವಿಧಿಃ ಕಥಂ ವಾ ತತ್ರ ಹೋಮಸ್ತತ್ರಾಽಽಹ —

ಗಾರ್ಹ್ಯ ಇತಿ ।

ಗೃಹೇ ಪ್ರಸಿದ್ಧೋ ಗಾರ್ಹ್ಯಃ । ಅತ್ರೇತಿ ಪುತ್ರಮಂಥಕರ್ಮೋಕ್ತಿಃ । ಅತೋ ಮದ್ಭಾರ್ಯಾತಃ ಸಕಾಶಾದ್ಭೋ ವಿಶ್ವಾವಸೋ ಗಂಧರ್ವತ್ವಮುತ್ತಿಷ್ಠಾನ್ಯಾಂ ಚ ಜಾಯಾಂ ಪ್ರಪೂರ್ವ್ಯಾಂ ತರುಣೀಂ ಪತ್ಯಾ ಸಹ ಸಂಕ್ರೀಡಮಾನಾಮಿಚ್ಛಾಹಂ ಪುನಃ ಸ್ವಾಮಿಮಾಂ ಜಾಯಾಂ ಸಮುಪೈಮೀತಿ ಮಂತ್ರಾರ್ಥಃ ॥೧೯॥