ಅಭಿಪತ್ತಿರಾಲಿಂಗನಮ್ । ಕದಾ ಕ್ಷೀರೌದನಾದಿಭೋಜನಂ ತದಾಹ —

ಕ್ಷೀರೇತಿ ।

ಭುಕ್ತ್ವಾಽಭಿಪದ್ಯತ ಇತಿ ಸಂಬಂಧಃ । ಅಹಂ ಪತಿರಮಃ ಪ್ರಾಣೋಽಸ್ಮಿ ಸಾ ತ್ವಂ ವಾಗಸಿ ಕಥಂ ತವ ಪ್ರಾಣತ್ವಂ ಮಮ ವಾಕ್ತ್ವಮಿತ್ಯಾಶಂಕ್ಯ ವಾಚಃ ಪ್ರಾಣಾಧೀನತ್ವವತ್ತವ ಮದಧೀನತ್ವಾದಿತ್ಯಭಿಪ್ರೇತ್ಯ ಸಾ ತ್ವಮಿತ್ಯಾದಿ ಪುನರ್ವಚನಮ್ । ಋಗಾಧಾರಂ ಹಿ ಸಾಮ ಗೀಯತೇ । ಅಸ್ತಿ ಚ ಮದಾಧಾರತ್ವಂ ತವ । ತಥಾ ಚ ಮಮ ಸಾಮತ್ವಮೃಕ್ತ್ವಂ ಚ ತವ । ದ್ಯೌರಹಂ ಪಿತೃತ್ವಾತ್ಪೃಥಿವೀ ತ್ವಂ ಮಾತೃತ್ವಾತ್ತಯೋರ್ಮಾತಾಪಿತೃತ್ವಸಿದ್ಧೇರಿತ್ಯರ್ಥಃ । ತಾವಾವಾಂ ಸಂರಭಾವಹೈ ಸಂರಂಭಮುದ್ಯಮಂ ಕರವಾವಹೈ । ಏಹಿ ತ್ವಮಾಗಚ್ಛ ।

ಕೋಽಸೌ ಸಂರಂಭಸ್ತಮಾಹ —

ಸಹೇತಿ ।

ಪುಂಸ್ತ್ವಯುಕ್ತಪುತ್ರಲಾಭಾಯ ರೇತೋಧಾರಣಂ ಕರ್ತವ್ಯಮಿತ್ಯರ್ಥಃ ॥೨೦॥