గీతాశాస్త్రస్యానాప్తప్రణీతత్వమపాకృత్య వ్యాఖ్యేయత్వముపపాదితముపసంహరతి –
తదిదమితి ।
పౌరుషేయస్య వచసో మూలప్రమాణాభావేనాప్రామాణ్యమితి మత్వా విశినష్టి –
సమస్తేతి ।
శాస్త్రాక్షరైరేవ తదర్థప్రతిపత్తిసమ్భవే కిమితి వ్యాఖ్యానమిత్యాశఙ్క్యాహ –
దుర్విజ్ఞేయార్థమితి ।
‘పదచ్ఛేదః పదార్థోక్తిర్విగ్రహో వాక్యయోజనా ।
ఆక్షేపస్య సమాధానం వ్యాక్యానం పఞ్చలక్షణమ్ ॥' ఇత్యాదిక్రమేణాస్య శాస్త్రస్య పూర్వాచార్యైర్వ్యాఖ్యాతత్వాత్ కిమర్థమిదమారభ్యతే గతార్థత్వాత్ , తత్రాహ –
తదర్థేతి ।
గీతాశాస్త్రార్థస్య ప్రకటీకరణార్థం పదవిభాగస్తదర్థోక్తిః సమాసద్వారా వాక్యార్థనిర్దేశః, తత్రాపేక్షితో న్యాయశ్చాక్షేపసమాధానలక్షణో వృత్తికారైర్దర్శితః తథాపి తథావిధమేవ శాస్త్రం శాస్త్రపరిచయశూన్యైః సముచ్చయవాదిభిర్విరుద్ధార్థత్వేనానేకార్థత్వేన చ గృహీతమాలక్ష్య తద్బుద్ధిమనురోద్ధుమిదమారబ్ధవ్యమిత్యర్థః ।
యేషాం ప్రాచీనే వ్యాఖ్యానే బుద్ధిరప్రవిష్టా తేషాం సమ్ప్రతితనే ఎతస్మిన్నసౌ ప్రవేక్ష్యతీతి కుతో నియమస్తత్రాహ –
వివేకత ఇతి ।
పూర్వవ్యాఖ్యానే తత్తదర్థనిర్ధారణార్థోపన్యాసః సఙ్కీర్ణవద్భాతీతి న తత్ర కేషాఞ్చిన్మనీషా సమున్మిషతి, ప్రకృతే త్వసమ్ప్రకీర్ణతయా తత్తత్పదార్థనిర్ణయోపయోగిన్యాయో వివ్రియతే, తేనాత్ర మన్దమధ్యమయోరపి బుద్ధిరవతరతీత్యర్థః । కిఞ్చ అనపేక్షితాధికగ్రన్థసద్భావాన్న ప్రాచీనే వ్యాఖ్యానే శ్రోతౄణాం ప్రవృత్తిః । అత్ర త్వపేక్షితాల్పగ్రన్థే వివరణే ప్రాయశః సర్వేషాం ప్రవృత్తిః స్యాదితి మత్వాహ –
సఙ్క్షేపత ఇతి ।