ಸ್ವಕೀಯಬಲಸ್ಯ ಭೀಷ್ಮಾಧಿಷ್ಠಿತತ್ವೇನ ಬಲಿಷ್ಠತ್ವಮುಕ್ತ್ವಾ ಭೀಷ್ಮಶೇಷತ್ವೇನ ತದನುಗುಣತ್ವಂ ದ್ರೋಣಾದೀನಾಂ ಪ್ರಾರ್ಥಯತೇ -

ಅಯನೇಷ್ವಿತಿ ।

ಕರ್ತವ್ಯವಿಶೇಷದ್ಯೋತೀ ಚಶಬ್ದಃ । ಸಮರಸಮಾರಂಭಸಮಯೇ ಯೋಧಾನಾಂ ಯಥಾಪ್ರಧಾನಂ ಯುದ್ಧಭೂಮೌ ಪೂರ್ವಾಪರಾದಿದಿಗ್ವಿಭಾಗೇನಾವಸ್ಥಿತಿಸ್ಥಾನಾನಿ ನಿಯಮ್ಯಂತೇ । ತಾನ್ಯತ್ರ ಅಯನಾನ್ಯುಚ್ಯಂತೇ । ಸೇನಾಪತಿಶ್ಚ ಸರ್ವಸೈನ್ಯಮಧಿಷ್ಠಾಯ ಮಧ್ಯೇ ತಿಷ್ಠತಿ । ತೇಷು ಸರ್ವೇಷು ಪ್ರಕ್ಲೃಪ್ತಂ ಪ್ರವಿಭಾಗಮಪ್ರತ್ಯಾಖ್ಯಾಯ ಭವಾನ್ ಅಶ್ವತ್ಥಾಮಾ ಕರ್ಣಶ್ಚೇತ್ಯೇವಮಾದಯೋ ಭವಂತಃ ಸರ್ವೇಽವಸ್ಥಿತಾಃ ಸಂತೋ ಭೀಷ್ಮಮೇವ ಸೇನಾಪತಿಂ ಸರ್ವತೋ ರಕ್ಷಂತು । ತಸ್ಯ ಹಿ ರಕ್ಷಣೇ ಸರ್ವಮಸ್ಮದೀಯಂ ಬಲಂ ರಕ್ಷಿತಂ ಸ್ಯಾತ್ , ಪರಬಲನಿವೃತ್ತ್ಯರ್ಥತ್ವೇನ ತಸ್ಯಾಸ್ಮಾಭೀ ರಕ್ಷಿತತ್ವಾದಿತ್ಯರ್ಥಃ ॥ ೧೧ ॥