స్వకీయబలస్య భీష్మాధిష్ఠితత్వేన బలిష్ఠత్వముక్త్వా భీష్మశేషత్వేన తదనుగుణత్వం ద్రోణాదీనాం ప్రార్థయతే -

అయనేష్వితి ।

కర్తవ్యవిశేషద్యోతీ చశబ్దః । సమరసమారమ్భసమయే యోధానాం యథాప్రధానం యుద్ధభూమౌ పూర్వాపరాదిదిగ్విభాగేనావస్థితిస్థానాని నియమ్యన్తే । తాన్యత్ర అయనాన్యుచ్యన్తే । సేనాపతిశ్చ సర్వసైన్యమధిష్ఠాయ మధ్యే తిష్ఠతి । తేషు సర్వేషు ప్రక్లృప్తం ప్రవిభాగమప్రత్యాఖ్యాయ భవాన్ అశ్వత్థామా కర్ణశ్చేత్యేవమాదయో భవన్తః సర్వేఽవస్థితాః సన్తో భీష్మమేవ సేనాపతిం సర్వతో రక్షన్తు । తస్య హి రక్షణే సర్వమస్మదీయం బలం రక్షితం స్యాత్ , పరబలనివృత్త్యర్థత్వేన తస్యాస్మాభీ రక్షితత్వాదిత్యర్థః ॥ ౧౧ ॥