ಪ್ರತಿಯೋಗಿನಾಮಭಾವೇ ಕಥಂ ತವ ಯುದ್ಧೌತ್ಸುಕ್ಯಂ ಫಲವದ್ ಭವೇದಿತಿ ತತ್ರಾಹ –

ಯೋತ್ಸ್ಯಮಾನಾನಿತಿ ।

ಯೇ ಕೇಚಿದೇತೇ ರಾಜಾನೋ ನಾನಾದೇಶೇಭ್ಯೋಽತ್ರ ಕುರುಕ್ಷೇತ್ರೇ ಸಮವೇತಾಸ್ತಾನಹಂ ಯೋತ್ಸ್ಯಮಾನಾನ್ - ಪರಿಗೃಹೀತಪ್ರಹರಣೋಪಾಯಾನ್ ಅತಿತರಾಂ ಸಂಗ್ರಾಮಸಮುತ್ಸುಕಾನುಪಲಭೇ ।  ತೇನ ಪ್ರತಿಯೋಗಿನಾಂ ಬಾಹುಲ್ಯಮಿತ್ಯರ್ಥಃ ।

ತೇಷಾಮಸ್ಮಾಭಿಃ ಸಹ ಪೂರ್ವವೈರಾಭಾವೇ ಕಥಂ ಪ್ರತಿಯೋಗಿತ್ವಂ ಪ್ರಕಲ್ಪತೇ ? ತತ್ರಾಹ -

ಧಾರ್ತರಾಷ್ಟ್ರಸ್ಯೇತಿ ।

ಧೃತರಾಷ್ಟ್ರಪುತ್ರಸ್ಯ ದುರ್ಯೋಧನಸ್ಯ ದುರ್ಬುದ್ಧೇಃ - ಸ್ವರಕ್ಷಣೋಪಾಯಮಪ್ರತಿಪದ್ಯಮಾನಸ್ಯ ಯುದ್ಧಾಯ ಸಂರಂಭಂ ಕುರ್ವತೋ ಯುದ್ಧೇ - ಯುದ್ಧಭೂಮೌ ಸ್ಥಿತ್ವಾ ಪ್ರಿಯಂ ಕರ್ತುಮಿಚ್ಛವೋ ರಾಜಾನಃ ಸಮಾಗತಾ ದೃಶ್ಯಂತೇ, ತೇನ ತೇಷಾಮೌಪಾಧಿಕಮಸ್ಮತ್ಪ್ರತಿಯೋಗಿತ್ವಮುಪಪನ್ನಮಿತ್ಯರ್ಥಃ ॥ ೨೩ ॥