ಕಿಂ ತದ್ವಾಕ್ಯಮಿತ್ಯಪೇಕ್ಷಾಯಾಮಾಹ –

ಶ್ರೀಭಗವಾನಿತಿ ।

ಕುತೋ - ಹೇತೋಸ್ತ್ವಾ - ತ್ವಾಂ ಸರ್ವಕ್ಷತ್ರಿಯಪ್ರವರಂ ಕಶ್ಮಲಂ - ಮಲಿನಂ ಶಿಷ್ಟಗರ್ಹಿತಂ ಯುದ್ಧಾತ್ ಪರಾಙ್ಮುಖತ್ವಂ ವಿಷಮೇ - ಸಭಯಸ್ಥಾನೇ ಸಮುಪಸ್ಥಿತಂ - ಪ್ರಾಪ್ತಮ್ ? ಅನಾರ್ಯೈಃ - ಶಾಸ್ತ್ರಾರ್ಥಮವಿದ್ವದ್ಭಿರ್ಜುಷ್ಟಂ - ಸೇವಿತಮ್ , ಅಸ್ವರ್ಗ್ಯಂ - ಸ್ವರ್ಗಾನರ್ಹಂ - ಪ್ರತ್ಯವಾಯಕಾರಣಮ್ , ಇಹ ಚ ಅಕೀರ್ತಿಕರಮ್ - ಅಯಶಸ್ಕರಮ್ ।  ಅರ್ಜುನನಾಮ್ನಾ ಪ್ರಖ್ಯಾತಸ್ಯ ತವ ನೈತದ್ಯುಕ್ತಮಿತ್ಯರ್ಥಃ ॥ ೨ ॥