ಏವಂ ಭಗವತಾ ಪ್ರತಿಬೋಧ್ಯಮಾನೋಽಪಿ ಶೋಕಾಭಿಭೂತಚೇತಸ್ತ್ವಾತ್ ಅಪ್ರತಿಬುಧ್ಯಮಾನಃ ಸನ್ ಅರ್ಜುನಃ ಸ್ವಾಭಿಪ್ರಾಯಮೇವ ಪ್ರಕೃತಂ ಭಗವಂತಂ ಪ್ರತ್ಯುಕ್ತವಾನ್ -

ಕಥಮಿತ್ಯಾದಿನಾ ।

ಭೀಷ್ಮಂ ಪಿತಾಮಹಂ ದ್ರೋಣಂ ಚಾಚಾರ್ಯಂ ಸಂಖ್ಯೇ - ರಣೇ ಹೇ ಮಧುಸೂದನ, ಇಷುಭಿಃ, ಯತ್ರ ವಾಚಾಪಿ ಯೋತ್ಸ್ಯಾಮೀತಿ  ವಕ್ತುಮನುಚಿತಂ ತತ್ರ ಕಥಂ ಬಾಣೈರ್ಯೋತ್ಸ್ಯೇ ಇತಿ ಭಾವಃ ।  ಸಾಯಕೈಸ್ತೌ ಕಥಂ ಪ್ರತಿಯೋತ್ಸ್ಯಾಮಿ - ಪ್ರತಿಯೋತ್ಸ್ಯೇ ? ತೌ ಹಿ ಪೂಜಾರ್ಹೌ - ಕುಸುಮಾದಿಭಿರರ್ಚನಯೋಗ್ಯೌ । ಹೇ ಅರಿಸೂದನ - ಸರ್ವಾನೇವ ಅರೀನ್ ಅಯತ್ನೇನ ಸೂದಿತವಾನಿತಿ ಭಗವಾನೇವಂ ಸಂಬೋಧ್ಯತೇ ॥ ೪ ॥