ರಾಜ್ಞಾಂ ಧರ್ಮೇಽಪಿ ಯುದ್ಧೇ ಗುರ್ವಾದಿವಧೇ ವೃತ್ತಿಮಾತ್ರಫಲತ್ವಂ ಗೃಹೀತ್ವಾ ಪಾಪಮಾರೋಪ್ಯ ಬ್ರೂತೇ -

ಗುರೂನಿತಿ ।

ಗುರೂನ್ - ಭೀಷ್ಮದ್ರೋಣಾದೀನ್ ಭ್ರಾತ್ರಾದೀಂಶ್ಚಾತ್ರ ಪ್ರಾಪ್ತಾನಹಿಂಸಿತ್ವಾ । ಮಹಾನುಭಾವಾನ್ - ಮಹಾಮಾಹಾತ್ಮ್ಯಾನ್ ಶ್ರುತಾಧ್ಯಯನಸಂಪನ್ನಾನ್ । ಶ್ರೇಯಃ - ಪ್ರಶಸ್ಯತರಂ ಯುಕ್ತಂ ಭೋಕ್ತುಂ - ಅಭ್ಯವಹರ್ತುಮ್ । ಭೈಕ್ಷಂ - ಭಿಕ್ಷಾಣಾಂ ಸಮೂಹಃ । ಭಿಕ್ಷಾಶನಂ ನೃಪಾದೀನಾಂ ನಿಷಿದ್ಧಮಪಿ ಇಹ ಲೋಕೇ -  ವ್ಯವಹಾರಭೂಮೌ । ನ ಹಿ ಗುರ್ವಾದಿಹಿಂಸಯಾ ರಾಜ್ಯಭೋಗೋಽಪೇಕ್ಷ್ಯತೇ । ಕಿಂಚ ಹತ್ವಾ ಗುರ್ವಾದೀನರ್ಥಕಾಮಾನೇವ ಭುಂಜೀಯ, ನ ಮೋಕ್ಷಮನುಭವೇಯಮ್ । ಇಹೈವ ಭೋಗಃ, ನ ಸ್ವರ್ಗೇ ।

ಅರ್ಥಕಾಮಾನೇವ ವಿಶಿನಷ್ಟಿ -

ಭೋಗಾನಿತಿ ।

ಭುಜ್ಯಂತೇ ಇತಿ ಭೋಗಾಃ, ತಾನ್ ರುಧಿರಪ್ರದಿಗ್ಧಾನ್ - ಲೋಹಿತಲಿಪ್ತಾನಿವ ಅತ್ಯಂತಗರ್ಹಿತಾನ್ , ಅತೋ ಭೋಗಾನ್ ಗುರುವಧಾದಿಸಾಧ್ಯಾನ್ ಪರಿತ್ಯಜ್ಯ ಭಿಕ್ಷಾಶನಮೇವ ಯುಕ್ತಮಿತ್ಯರ್ಥಃ ॥ ೫ ॥