ಕ್ಷತ್ರಿಯಾಣಾಂ ಸ್ವಧರ್ಮತ್ವಾದ್ಯುದ್ಧಮೇವ ಶ್ರೇಯಸ್ಕರಮಿತ್ಯಾಶಂಕ್ಯಾಹ -

ನ ಚೈತದಿತಿ ।

ಏತದಪಿ ನ ಜಾನೀಮೋ ಭೈಕ್ಷಯುದ್ಧಯೋಃ ಕತರನ್ನೋಽಸ್ಮಾಕಂ ಗರೀಯಃ - ಶ್ರೇಷ್ಠಮ್ , ಕಿಂ ಭೈಕ್ಷಂ ಹಿಂಸಾಶೂನ್ಯತ್ವಾತ್ , ಉತ ಯುದ್ಧಂ ಸ್ವವೃತ್ತಿತ್ವಾತ್ ? ಇತಿ । ಸಂದಿಗ್ಧಾ ಚ ಜಯಸ್ಥಿತಿಃ । ಕಿಂ ಸಾಮ್ಯಮೇವೋಭಯೇಷಾಂ ಯದ್ವಾ ವಯಂ ಜಯೇಮ - ಅತಿಶಯೀಮಹಿ, ಯದಿ ವಾ ನೋಽಸ್ಮಾನ್ ಧಾರ್ತರಾಷ್ಟ್ರಾಃ - ದುರ್ಯೋಧನಾದಯೋ ಜಯೇಯುಃ ? ಜಾತೋಽಪಿ ಜಯೋ ನ ಫಲವಾನ್ , ಯತೋ ಯಾನ್ ಬಂಧೂನ್ ಹತ್ವಾ ನ ಜಿಜೀವಿಷಾಮಃ - ಜೀವಿತುಂ ನೇಚ್ಛಾಮಃ, ತೇ ಏವಾವಸ್ಥಿತಾಃ, ಪ್ರಮುಖೇ - ಸಮ್ಮುಖೇ, ಧಾರ್ತರಾಷ್ಟ್ರಾಃ - ಧೃತರಾಷ್ಟ್ರಸ್ಯಾಪತ್ಯಾನಿ । ತಸ್ಮಾದ್ಭೈಕ್ಷಾದ್ಯುದ್ಧಸ್ಯ ಶ್ರೇಷ್ಠತ್ವಂ ನ ಸಿದ್ಧಮಿತ್ಯರ್ಥಃ ॥ ೬ ॥