క్షత్రియాణాం స్వధర్మత్వాద్యుద్ధమేవ శ్రేయస్కరమిత్యాశఙ్క్యాహ -

న చైతదితి ।

ఎతదపి న జానీమో భైక్షయుద్ధయోః కతరన్నోఽస్మాకం గరీయః - శ్రేష్ఠమ్ , కిం భైక్షం హింసాశూన్యత్వాత్ , ఉత యుద్ధం స్వవృత్తిత్వాత్ ? ఇతి । సన్దిగ్ధా చ జయస్థితిః । కిం సామ్యమేవోభయేషాం యద్వా వయం జయేమ - అతిశయీమహి, యది వా నోఽస్మాన్ ధార్తరాష్ట్రాః - దుర్యోధనాదయో జయేయుః ? జాతోఽపి జయో న ఫలవాన్ , యతో యాన్ బన్ధూన్ హత్వా న జిజీవిషామః - జీవితుం నేచ్ఛామః, తే ఎవావస్థితాః, ప్రముఖే - సమ్ముఖే, ధార్తరాష్ట్రాః - ధృతరాష్ట్రస్యాపత్యాని । తస్మాద్భైక్షాద్యుద్ధస్య శ్రేష్ఠత్వం న సిద్ధమిత్యర్థః ॥ ౬ ॥