ಕುತೋ ನಿಃಶ್ರೇಯಸಮೇವೇಚ್ಛಸಿ ತತ್ರಾಹ -

ನ ಹೀತಿ ।

ಯಸ್ಮಾನ್ನ ಪ್ರಪಶ್ಯಾಮಿ । ಕಿಂ ನ ಪಶ್ಯಸಿ ? ಮಮಾಪನುದ್ಯಾತ್ -  ಅಪನಯೇತ್ । ಯತ್ ಶೋಕಮುಚ್ಛೋಷಣಂ - ಪ್ರತಪನಮಿಂದ್ರಿಯಾಣಾಂ ತನ್ನ ಪಶ್ಯಾಮಿ ।

ನನು ಶತ್ರೂನ್ ನಿಹತ್ಯ ರಾಜ್ಯೇ ಪ್ರಾಪ್ತೇ ಶೋಕನಿವೃತ್ತಿಸ್ತೇ ಭವಿಷ್ಯತಿ, ನೇತ್ಯಾಹ -

ಅವಾಪ್ಯೇತಿ ।

ಅವಿದ್ಯಮಾನಃ ಸಪತ್ನಃ ಶತ್ರುರ್ಯಸ್ಯ ತದ್ ದೃಢಂ ರಾಜ್ಯಂ - ರಾಜ್ಞಃ ಕರ್ಮ ಪ್ರಜಾರಕ್ಷಣಪ್ರಶಾಸನಾದಿ । ತದಿದಮಸ್ಯಾಂ ಭೂಮಾವವಾಪ್ಯಾಪಿ ಶೋಕಾಪನಯಕಾರಣಂ ನ ಪಶ್ಯಾಮೀತ್ಯರ್ಥಃ ।

ತರ್ಹಿ ದೇವೇಂದ್ರತ್ವಾದಿಪ್ರಾಪ್ತ್ಯಾ ಶೋಕಾಪನಯಸ್ತೇ ಭವಿಷ್ಯತಿ, ನೇತ್ಯಾಹ -

ಸುರಾಣಾಮಪೀತಿ ।

ತೇಷಾಮಾಧಿಪತ್ಯಂ - ಅಧಿಪತಿತ್ವಂ ಸ್ವಾಮ್ಯಮಿಂದ್ರತ್ವಂ ಬ್ರಹ್ಮತ್ವಂ ವಾ, ತದವಾಪ್ಯಾಪಿ ಮಮ ಶೋಕೋ ನಾಪಗಚ್ಛೇದಿತ್ಯರ್ಥಃ ॥ ೮ ॥