ಬುದ್ಧಿಯುಕ್ತಸ್ಯ ಬುದ್ಧಿಯೋಗಾಧೀನಂ ಪ್ರಕರ್ಷಂ ಸೂಚಯತಿ -
ಬುದ್ಧೀತಿ ।
ಬುದ್ಧಿಸಂಬಂಧಾಸಂಬಂಧಾಭ್ಯಾಂ ಕರ್ಮಣಿ ಪ್ರಕರ್ಷನಿಕರ್ಷಯೋರ್ಭಾವೇ ಕರಣೀಯಂ ನಿಯಚ್ಛತಿ -
ಬುದ್ಧಾವಿತಿ ।
ಯತ್ತು ಫಲೇಚ್ಛಯಾಪಿ ಕರ್ಮಾನುಷ್ಠಾನಂ ಸುಕರಮಿತಿ, ತತ್ರಾಹ -
ಕೃಪಣೇತಿ ।
ನಿಕೃಷ್ಟಂ ಕರ್ಮೈವ ವಿಶಿನಷ್ಟಿ -
ಫಲಾರ್ಥಿನೇತಿ ।
ಕಸ್ಮಾತ್ ಪ್ರತಿಯೋಗಿನಃ ಸಕಾಶಾದಿದಂ ನಿಕೃಷ್ಟಮ್ ? ಇತ್ಯಾಶಂಕ್ಯ, ಪ್ರತೀಕಮುಪಾದಾಯ ವ್ಯಾಚಷ್ಟೇ -
ಬುದ್ಧೀತ್ಯಾದಿನಾ ।
ಫಲಾಭಿಲಾಷೇಣ ಕ್ರಿಯಮಾಣಸ್ಯ ಕರ್ಮಣೋ ನಿಕೃಷ್ಟತ್ವೇ ಹೇತುಮಾಹ -
ಜನ್ಮೇತಿ ।
ಸಮತ್ವಬುದ್ಧಿಯುಕ್ತಾತ್ ಕರ್ಮಣಃ ತದ್ಧೀನಸ್ಯ ಕರ್ಮಣೋ ಜನ್ಮಾದಿಹೇತುತ್ವೇನ ನಿಕೃಷ್ಟತ್ವೇ ಫಲಿತಮಾಹ -
ಯತ ಇತಿ ।
ಯೋಗವಿಷಯಾ ಬುದ್ಧಿಃ ಸಮತ್ವಬುದ್ಧಿಃ ।
ಬುದ್ಧಿಶಬ್ದಸ್ಯ ಅರ್ಥಾಂತರಮಾಹ -
ತತ್ಪರಿಪಾಕೇತಿ ।
ತಚ್ಛಬ್ದೇನ ಸಮತ್ವಬುದ್ಧಿಸಮನ್ವಿತಂ ಕರ್ಮ ಗೃಹ್ಯತೇ । ತಸ್ಯ ಪರಿಪಾಕಃ - ತತ್ಫಲಭೂತಾ ಬುದ್ಧಿಶುದ್ಧಿಃ ।
ಶರಣಶಬ್ದಸ್ಯ ಪರ್ಯಾಯಂ ಗೃಹೀತ್ವಾ ವಿವಕ್ಷಿತಮರ್ಥಮಾಹ -
ಅಭಯೇತಿ ।
ಸಪ್ತಮೀಮವಿವಕ್ಷಿತ್ವಾ ದ್ವಿತೀಯಂ ಪಕ್ಷಂ ಗೃಹೀತ್ವಾ ವಾಕ್ಯಾರ್ಥಮಾಹ -
ಪರಮಾರ್ಥೇತಿ ।
ತಥಾವಿಧಜ್ಞಾನಶರಣತ್ವೇ ಹೇತುಮಾಹ -
ಯತ ಇತಿ ।
ಫಲಹೇತುತ್ವಂ ವಿವೃಣೋತಿ -
ಫಲೇತಿ ।
ತೇನ ಪರಮಾರ್ಥಜ್ಞಾನಶರಣತೈವ ಯುಕ್ತೇತಿ ಶೇಷಃ ।
ಪರಮಾರ್ಥಜ್ಞಾನಬಹಿರ್ಮುಖಾನಾಂ ಕೃಪಣತ್ವೇ ಶ್ರುತಿಂ ಪ್ರಮಾಣಯತಿ -
ಯೋ ವಾ ಇತಿ ।
ಅಸ್ಥೂಲಾದಿವಿಶೇಷಣಂ ಏತದಿತ್ಯುಚ್ಯತೇ ॥ ೪೯ ॥