ಸಮನಂತರಶ್ಲೋಕದ್ವಯತಾತ್ಪರ್ಯಮಾಹ -

ಅಥೇತಿ ।

ಪುರುಷಾರ್ಥೋಪಾಯೋಪದೇಶಾನಂತರ್ಯಮಥಶಬ್ದಾರ್ಥಃ ।

ತನ್ನಿಷ್ಠತ್ವರಾಹಿತ್ಯಾವಸ್ಥಾಂ ದರ್ಶಯತಿ -

ಇದಾನೀಮಿತಿ ।

ಪರಾಭವಿಷ್ಯತಃ - ಮಹಾಂತಮನರ್ಥಂ ಗಮಿಷ್ಯತಃ । ವಿವೇಕವಿಜ್ಞಾನವಿಹೀನಸ್ಯೇತಿ ಯಾವತ್ । ಸರ್ವಾನರ್ಥಮೂಲಂ ವಿಷಯಾಭಿಧ್ಯಾನಂ ತಸ್ಯ ತಥಾತ್ವಮನುಭವಸಿದ್ಧಮಿತಿ ವಕ್ತುಮಿದಮಿತ್ಯುಕ್ತಮ್ । ವಿಷಯೇಷು ವಿಶೇಷತ್ವಮಾರೋಪಿತರಮಣೀಯತ್ವಮ್ । ಪ್ರೀತಿರಾಸಕ್ತಿರಿತಿ ಸಾಧಾರಣಾಸಕ್ತಿಮಾತ್ರಂ ಗೃಹ್ಯತೇ । ತೃಷ್ಣೇತಿ ಉದ್ರಿಕ್ತಾ ಸಕ್ತಿರುಕ್ತಾ । ಪ್ರತಿಬಂಧೇನ ಪ್ರಣಾಶೇನ ವಾ ಪ್ರತಿಹತಿಃ ॥ ೬೨ ॥