ನನು - ಅಸಂನ್ಯಾಸಿನಾಪಿ ವಿದ್ಯಾವತಾಂ ವಿದ್ಯಾಫಲಸ್ಯ ಮೋಕ್ಷಸ್ಯ ಲಬ್ಧುಂ ಶಕ್ಯತ್ವಾತ್ ಕಿಮಿತಿ ವಿದುಷಃ ಸಂನ್ಯಾಸೋ ನಿಯಮ್ಯತೇ ? ತತ್ರಾಹ -

ವಿದುಷ ಇತಿ ।

ಆಪಾತಜ್ಞಾನವತೋ ವಿವೇಕವೈರಾಗ್ಯಾದಿವಿಶಿಷ್ಟಸ್ಯ ಏಷಣಾಭ್ಯಃ ಸರ್ವಾಭ್ಯೋಽಭ್ಯುತ್ಥಿತಸ್ಯ ಶ್ರವಣಾದಿದ್ವಾರಾ ಸಮುತ್ಪನ್ನಸಾಕ್ಷಾತ್ಕಾರವತೋ ಮುಖ್ಯಸ್ಯ ಸಂನ್ಯಾಸಿನೋ ಮೋಕ್ಷಃ, ನ ಅನ್ಯಸ್ಯ ವಿಷಯತೃಷ್ಣಾಪರಿಭೂತಸ್ಯ, ಇತ್ಯೇತತ್ ದೃಷ್ಟಾಂತೇನ ಪ್ರತಿಪಾದಯಿತುಮಿಚ್ಛನ್ , ‘ರಾಗದ್ವೇಷವಿಯುಕ್ತೈಸ್ತು’ (ಭ. ಗೀ. ೨. ೬೪) ಇತಿ ಶ್ಲೋಕೋಕ್ತಮೇವಾರ್ಥಂ ಪುನರಾಹೇತಿ ಯೋಜನಾ ।