నను - అసంన్యాసినాపి విద్యావతాం విద్యాఫలస్య మోక్షస్య లబ్ధుం శక్యత్వాత్ కిమితి విదుషః సంన్యాసో నియమ్యతే ? తత్రాహ -

విదుష ఇతి ।

ఆపాతజ్ఞానవతో వివేకవైరాగ్యాదివిశిష్టస్య ఎషణాభ్యః సర్వాభ్యోఽభ్యుత్థితస్య శ్రవణాదిద్వారా సముత్పన్నసాక్షాత్కారవతో ముఖ్యస్య సంన్యాసినో మోక్షః, న అన్యస్య విషయతృష్ణాపరిభూతస్య, ఇత్యేతత్ దృష్టాన్తేన ప్రతిపాదయితుమిచ్ఛన్ , ‘రాగద్వేషవియుక్తైస్తు’ (భ. గీ. ౨. ౬౪) ఇతి శ్లోకోక్తమేవార్థం పునరాహేతి యోజనా ।