ಪೂರ್ವೋತ್ತರಾಧ್ಯಾಯಯೋಃ ಸಂಬಂಧಂ ವಕ್ತುಂ ಪೂರ್ವಸ್ಮಿನ್ನಧ್ಯಾಯೇ ವೃತ್ತಮರ್ಥಂ ಸಂಕ್ಷಿಪ್ಯಾನುವದತಿ -
ಶಾಸ್ತ್ರಸ್ಯೇತಿ ।
ಗೀತಾಶಾಸ್ತ್ರಪ್ರಾರಂಭಾಪೇಕ್ಷಿತಂ ಹೇತುಫಲಭೂತಂ ಬುದ್ಧಿದ್ವಯಂ ಭಗವತೋಪದಿಷ್ಟಮಿತ್ಯರ್ಥಃ ।
ಪ್ರಷ್ಟುರರ್ಜುನಸ್ಯಾಭಿಪ್ರಾಯಂ ನಿರ್ದೇಷ್ಟುಂ ಪ್ರವೃತ್ತಮರ್ಥಾಂತರಮನುವದತಿ -
ತತ್ರೇತಿ ।
ಅಧ್ಯಾಯೋ ಬುದ್ಧಿದ್ವಯನಿರ್ಧಾರಣಂ ವಾ ಸಪ್ತಮ್ಯರ್ಥಃ । ಪಾರಮಾರ್ಥಿಕೇ ತತ್ತ್ವೇ ಯಜ್ಜ್ಞಾನಂ ತನ್ನಿಷ್ಠಾನಾಮಶೇಷಕಾಮತ್ಯಾಗಿನಾಂ ಕಾಮಯುಕ್ತಾನಾಂ ಕರ್ಮಿಣಾಮಪಿ ಪ್ರತಿಪತ್ತಿಕರ್ಮವತ್ ತ್ಯಾಗಂ ಕರ್ತವ್ಯತ್ವೇನ ಭಗವಾನುಕ್ತವಾನಿತ್ಯರ್ಥಃ ।
ತಥಾಽಪಿ ಮೋಕ್ಷಸಾಧನೇ ವಿಕಲ್ಪಸಮುಚ್ಚಯಯೋರನ್ಯತರಸ್ಯ ವಿವಕ್ಷಿತತ್ವಬುದ್ಧ್ಯಾ ಸಮನಂತರಪ್ರಶ್ನಪ್ರವೃತ್ತಿರಿತ್ಯಾಶಂಕ್ಯಾಹ -
ಉಕ್ತೇತಿ ।
ಅರ್ಜುನಸ್ಯ ಮನಸಿ ವ್ಯಾಕುಲತ್ವಂ ಪ್ರಶ್ನಬೀಜಂ ದರ್ಶಯಿತುಮುಕ್ತಮರ್ಥಾಂತರಮನುಭಾಷತೇ -
ಅರ್ಜುನಾಯ ಚೇತಿ ।
ಸಾಂಖ್ಯಬುದ್ಧಿಮಾಶ್ರಿತ್ಯ ಕರ್ಮತ್ಯಾಗಮುಕ್ತ್ವಾ, ಪುನಸ್ತಸ್ಯೈವ ಕರ್ತವ್ಯತ್ವಂ ಕಥಂ ಮಿಥೋ ವಿರುದ್ಧಂ ಬ್ರವೀತಿ ? ಇತ್ಯಾಶಂಕ್ಯಾಹ -
ಯೋಗೇತಿ ।
ಯಥಾ ಸಾಂಖ್ಯಬುದ್ಧಿಮಾಶ್ರಿತಾನಾಂ ಸಂನ್ಯಾಸದ್ವಾರಾ ತನ್ನಿಷ್ಠಾನಾಂ ಕೃತಾರ್ಥತೋಕ್ತಾ, ತಥಾ ಯೋಗಬುದ್ಧಿಮಾಶ್ರಿತ್ಯ ಕರ್ಮ ಕುರ್ವತೋಽಪಿ ಕೃತಾರ್ಥತ್ವಮುಕ್ತಮಿತ್ಯಾಶಂಕ್ಯಾಹ -
ನ ತತ ಏವೇತಿ ।
‘ದೂರೇಣ ಹ್ಯವರಂ ಕರ್ಮ ಬುದ್ಧಿಯೋಗಾತ್’ (ಭ. ಗೀ. ೨-೪೯) ಇತಿ ದರ್ಶನಾದಿತಿ ಶೇಷಃ ।
ಬುದ್ಧಿವ್ಯಾಕುಲತ್ವಂ ಪ್ರಶ್ನಬೀಜಂ ಪ್ರತಿಲಭ್ಯ ಪ್ರಶ್ನಂ ಕರೋತೀತ್ಯಾಹ -
ತದೇತದಿತಿ ।
ಸಾಕ್ಷಾದೇವ ಶ್ರೇಯಃಸಾಧನಂ ಜ್ಞಾನಮನ್ಯೇಭ್ಯೋ ದರ್ಶಿತಂ - ತದಿತ್ಯುಚ್ಯತೇ । ತದ್ವಿಪರೀತಂ ಕರ್ಮ ಸ್ವಸ್ಯಾನುಷ್ಠೇಯತ್ವೇನೋಕ್ತಮ್ - ಏತದಿತಿ ನಿರ್ದಿಶ್ಯತೇ । ಭಗವದುಕ್ತೇಽರ್ಥೇ ಸಂದಿಹ್ಯಮಾನಸ್ಯ ನಿರ್ಣಯಾಕಾಂಕ್ಷಯಾ ಪ್ರಶ್ನಪ್ರವೃತ್ತೇರಸ್ತಿ ಪೂರ್ವೋತ್ತರಾಧ್ಯಾಯಯೋರುತ್ಥಾಪ್ಯೋತ್ಥಾಪಕಲಕ್ಷಣಾ ಸಂಗತಿರಿತ್ಯರ್ಥಃ ।
ಅರ್ಜುನಸ್ಯ ಪ್ರಶ್ನನಿಮಿತ್ತಂ ಪರ್ಯಾಕುಲತ್ವಂ ಪ್ರಪಂಚಯತಿ -
ಕಥಮಿತ್ಯಾದಿನಾ ।
ಯದ್ಧಿ ಸಾಕ್ಷಾದೇವ ಶ್ರೇಯಃಸಾಧನಂ ಸಾಂಖ್ಯಶಬ್ದಿತಪರಮಾರ್ಥತತ್ತ್ವವಿಷಯಬುದ್ಧೌ ನಿಷ್ಠಾರೂಪಂ, ತದ್ ಅನ್ಯಸ್ಮೈ ಶ್ರೇಯೋಽರ್ಥಿನೇ ಭಕ್ತಾಯ ಶ್ರಾವಯಿತ್ವಾ, ಮಾಂ ಪುನರಭಕ್ತಮ್ ಅಶ್ರೇಯೋಽರ್ಥಿನಮಿವ ಕರ್ಮಣಿ ಪೂರ್ವೋಕ್ತವಿಪರೀತೇ ಕಥಂ ಭಗವಾನ್ ನಿಯೋಕ್ತುಮರ್ಹತೀತ್ಯರ್ಜುನಸ್ಯ ಪರ್ಯಾಕುಲೀಭಾವೋ ಯುಕ್ತ ಇತಿ ಸಂಬಂಧಃ ।
ಜ್ಞಾನನಿಷ್ಠಾತೋ ವೈಪರೀತ್ಯಂ ಸ್ಫೋರಯಿತುಂ ಕರ್ಮ ವಿಶಿನಷ್ಟಿ -
ದೃಷ್ಟೇತಿ ।
ಯುದ್ಧೇ ಹಿ ಕ್ಷತ್ರಕರ್ಮಣಿ ದೃಷ್ಟೋಽನೇಕೋಽನರ್ಥೋ ಗುರುಭ್ರಾತೃಹಿಂಸಾದಿಃ ತೇನ ಸಂಬದ್ಧೇ ಬುದ್ಧಿಶುದ್ಧಿದ್ವಾರಾಽಪಿ ವರ್ತಮಾನೇ ಜನ್ಮನ್ಯೇವ ಫಲಮಿತ್ಯನಿಯತೇ । ಮಮ -ಭಕ್ತಸ್ಯ ಶ್ರೇಯೋಽರ್ಥಿನೋ ನಿಯೋಗೋ ಭಗವತಾ ಯುಕ್ತೋ ನ ಭವತೀತಿ ಶೇಷಃ ।
ಯಥೋಕ್ತಂ ನಿಮಿತ್ತಂ ಪ್ರಶ್ನಸ್ಯ ಯುಕ್ತಂ ತದನುಗುಣತ್ವಾತ್ ತಸ್ಯೇತಿ ದ್ಯೋತಕಮಾಹ -
ತದನುರೂಪಶ್ಚೇತಿ ।
ಜ್ಞಾನನಿಷ್ಠಾನಾಂ ಕೃತಾರ್ಥತಾ, ಕರ್ಮನಿಷ್ಠಾನಾಂ ತು ನ ತಥೇತ್ಯುಕ್ತಮ್ ।
ವಿಭಾಗಭಾಗಿ ಶಾಸ್ತ್ರಮಿತ್ಯತ್ರ ‘ಲೋಕೇಽಸ್ಮಿನ್’ (ಭ. ಗೀ. ೩-೩) ಇತ್ಯಾದಿವಾಕ್ಯಸ್ಯಾಪಿ ದ್ಯೋತಕತ್ವಂ ದರ್ಶಯತಿ -
ಪ್ರಶ್ನೇತಿ ॥