ಪ್ರಶ್ನಾನುಪಪತ್ತಿಮೇವ ಪ್ರಪಂಚಯತಿ -

ಯದಿ ಹೀತಿ ।

ಸಮುಚ್ಚಯೋಪದೇಶೇ ಪ್ರಶ್ನೈಕದೇಶಾನುಪಪತ್ತೇಶ್ಚ ನ ತದುಪದೇಶೋಪಪತ್ತಿರಿತ್ಯಾಹ -

ಅರ್ಜುನಾಯೇತಿ ।

‘ಕರ್ಮಣ್ಯೇವಾಧಿಕಾರಸ್ತೇ ಮಾ ಫಲೇಷು ಕದಾಚನ’ (ಭ. ಗೀ. ೨-೪೭) ಇತ್ಯರ್ಜುನಂ ಪ್ರತ್ಯುಪದೇಶಾತ್ ತಂ ಪ್ರತಿ ಜ್ಯಾಯಸೀ ಬುದ್ಧಿರ್ನೋಕ್ತೇತಿ ಯುಕ್ತಂ, ‘ತತ್ ಕಿಮ್’ (ಭ. ಗೀ. ೩-೧) ಇತ್ಯಾದ್ಯುಪಾಲಂಭವಚನಮಿತ್ಯಾಶಂಕ್ಯಾಹ -

ನಚೇತಿ ।

ಯೇನ ಕಲ್ಪನೇನ ‘ಜ್ಯಾಯಸೀ ಚೇದ್’ (ಭ. ಗೀ. ೩-೧) ಇತ್ಯಾರಭ್ಯಂ ‘ತತ್ಕಿಂ ಕರ್ಮಣಿ’ (ಭ. ಗೀ. ೩-೧) ಇತ್ಯುಪಾಲಂಭಾತ್ಮಾ ಪ್ರಶ್ನಃ ಸ್ಯಾತ್ ತಥಾ ನ ಯುಕ್ತಂ ಕಲ್ಪಯಿತುಮ್ ‘ಏಷಾ ತೇಽಭಿಹಿತಾ ಸಾಂಖ್ಯೇ ಬುದ್ಧಿ’ (ಭ. ಗೀ. ೨-೩೯ ) ಇತಿ ವಚನವಿರೋಧಾದಿತಿ ಯೋಜನಾ ।