‘యస్య వా ఎతత్ కర్మ’ (కౌ. ఉ. ౪. ౧౭) ఇతి శ్రుతావివ కర్మశబ్దస్య క్రియమాణవస్తువిషయత్వమాశఙ్క్య వ్యాచష్టే -
క్రియాణామితి ।
తాశ్చనిత్యనైమిత్తికత్వేన విభజతే -
యజ్ఞాదీనామితి ।
అస్మిన్నేవ జన్మని అనుష్ఠితానాం కర్మణాం బుద్ధిశుద్ధిద్వారా జ్ఞానకారణత్వే, బ్రహ్మచారిణాం కుతో జ్ఞానోత్పత్తిర్జన్మాన్తరకృతానాం కర్మణాం వా తథాత్వే, గృహస్థాదీనామైహికాని కర్మాణి న జ్ఞానహేతవః స్యురిత్యాశఙ్క్య అనియమం దర్శయతి -
ఇహేతి ।
నేమాని సత్త్వశుద్ధికారణాని ఉపాత్తదురితప్రతిబన్ధాదిత్యాశఙ్క్యాహ -
ఉపాత్తేతి ।
తర్హి తావతైవ కృతార్థానాం కుతో జ్ఞాననిష్ఠాహేతుత్వం, తత్రాహ -
తత్కారణత్వేనేతి ।
కర్మణాం చిత్తశుద్ధిద్వారా జ్ఞానహేతుత్వే మానమాహ -
జ్ఞానమితి ।
అనారమ్భశబ్దస్యోపక్రమవిపరీతవిషయత్వం వ్యావర్తయతి-
అననుష్ఠానాదితి ।
నిష్కర్మణః సంన్యాసినః కర్మజ్ఞానం నైష్కర్మ్యమితి వ్యాచష్టే -
నిష్కర్మేతి ।
కర్మాభావావస్థాం వ్యవచ్ఛినత్తి -
జ్ఞానయోగేనేతి ।
తస్యాః సాధనపక్షపాతిత్వం వ్యావర్తయతి -
నిష్క్రియేతి ।